Muine loäbn Noahbas un Frünne!

Ji hätt ßicha van Jiun Kinnan oadda Grautkinnan hoäat, dat huia in iusn Kreise dat Impfen wia in’n Gange was. Oach, dä lüttken Studentn hätt moe ßäo richtich laiddäon! Un niu näo ßäo kocht vo Wuihnachen! – Dat was doach in iusa Jiugend näo nich ßäo laige! Giwisse mössen dä Lüttken ßäo inna Moätuit noan „Poggen“. Oabba dat was doach maia ’n Vognoögn. Oach joa, dä lüttken Muise grihn’n un schnucken bui düssa Prozedua äok düht, oabba doa woch ßick nich an stoöat. Kinna gruint ßäo fahken, un worümme, dat könnt ßä joa näo nich ßeggen! Eck moäne, dat woöa ubbn Lanne maia ßoanne „Modenschau“ in’n Lüttken wehsen. Dänn hedden maistens dä Väddan dat oäaste Moal ßick richtig wat mäaken loadn un üa Väddangischänk mosse teon oäastn Moal anna Öffentlichkoät.

Vandahge waiat dä Bracken joa vihl mai impfet. Gihgen dä Poggen, gihgen Stichhäoßen, gihgen Kinnalähmung! Un niu düsse Dahge gihgn Tetanus un „Gifteritis“, oasse moe ßoan’n lüttke Dolf, dä moe inne Moede loäp, votelle. Und dat nihmt dä Gäste oalle ßäo hän, oasse wänn dat teo üan Schoölabudda hoäa! Oabba dat ett bui düssen lüttken düchtigen Soldoadn äok wia Fahnenflüchtige giff, dat häbbe eck düsse Dahge ßoän, oasse eck just bui oäna Schäole headräob. Twoä van dä Gräodn hedden just ßoan’n lüttken Rekriudn iudn Schoelmästagoan halt. Hoä wia ßick, bait un schläog ümme ßick, dat moe dat Hachte in’n Luibe lache. Eck ßin moall doachta in’n Münstalanne wesen, doa packen ßä wilde Pea. Oabba dat was Kinnaspell gihgen düsse „Zähmung“.

Un niu kamm dat „Kruigsgericht“! Dat was dä Lehrerin! Eck dachte: „Watt dat niu wall giff?“ – Dä küa ßoan lüttket bihden met dänn Proat, packen ganz ßinnig anne Hand, un hoä gunk mett oasse ßoan Lamm! – Eck häbbe moe stillken wia van muin’n „Horchposten“ truigge tohgen. Oabba iudn Koppe woll moe dä Gischichte doach näo nich! Wat kann ßoanne Freosluihand doach buiruihigen! Oach, wän ßoät dat man oalle doän! Un wän wui’t us man jümma gefallen loädn! – Un dä lüttke Reinhard woll moe äok nich iudn Koppe!  -  Wat häbbe eck in’n twoä Kruihgen uppstellt, wän eck vo ßoanne Impfung heakuhm’m konn! Säolange, bät ßoä moe packet heddn! Un doa kraich eck oalle noa, äok dä, dä eck wirklich oall krihgen hadde! Säo tapfa ßinn eck oabba nich wehsen, oasse düsse lüttke Iutruida! Vihlichte hät uß däomoal bleoß dä ßinnigen Freosluihänne failt!

Eck moäne düsse geon un ßinngen Freosluihänne failn us vondahge oallewegen. Buißonnas äok inna ßuigen un häogen Politik. Loat’t us dat moall buißonnas to Wuihnachen oableggen!

Fruidn un Glückßäligkoät wünsket Ji oalle