Muine loäbn Noahbas un Frünne!

„Frünne inna Näot goaht hunnat upp oän Läot!“ – Oabba man dräppt teo ßälten dänn Hunnatsten! –

Kaims Koal hadd’n Foöa Schnitzel halt. Hoä hadde voäa Flächtn buißet’t, dänn Schnitzel ßind joa just nich ßäo schwoa. Oabba ett was doach ’n düt Foöa woan. Un watt datt Malloöa ßuin ßoll, Koal bränne datt rechte Ächtarad faste. –

Junge, datt ühn datt huia ßäo wuit van’n Hiuse oabakuhm’m mosse! Un just hoi hadde doach ßüß jümma oalles geot in Schmea! – Oabba mett dänn Schmea hedde hoä datt wall näo hänkrihgen, wänn just oäna inna Noächte wesen woöa, dä mett anpacket hedde, datt hoi affrahn konn! – Oabba doach, doa kamm Buskgraibn Hinnack ümme dä Ecke schlüat! Giwisse, dä wuhne huia joa inna Noächte. Datt was Hülpe inna Näot!

„Oach, ßuih, geon Dach Hinnack!“ – Koal hadde hännig ßuine Malesken votellt. „Kuik, doa häbbe eck doch näo Glücke hatt. Diu bis wall ßäo geot un packs moe just datt Rad mett an!“ – „Oach nai, Koal, datt goät nich. Eck woll just noa Spakasse, Wänn dä moe dä Düa vo dä Nesen teomahket, dänn häbbe eck dänn ganzen Wäch ümmeßüß mahket!“ – Kinna, Kinna, doa heddn ji Kaims Koal moall ßoän ßollt! Hoä sticke ßick oäne an, datt ßuin Gißichte gloögge oasse wänn man in’n Backobbn kickt! Koal, dä dänn Lüns un dä Büssen oall afftogen hadde, sprang achtan Wagen, graip mett boädn Hän’n an dä Ächtaahms un schmait dänn Wagen noa links haroba, datt dä Assen frui woch. – „Käal!“ Roäp Hinnack, dän ßuine Nuischiagkoät niu doach gröädda was oasse dä Uile, „Käal, diu bis oabba stahk!“ – Oasse Koal niu oabba mett risken Kamme un mett Kniufuistn vo Hinnack stoand un nich maia ganz ßinnig ßeä: „Wänn eck ßoan’n Minsken oasse di vo moe steohn häbbe, dänn ßin eck näo maia oasse dubbelt ßäo stahk!“ – Doa haddet Hinnack oabba upp oänmoall wia unwuis uilig. Niu oabba nich wegen dä Spakasse!

Szäo „gifällig“ eß Hinnack, dä ßick ßümms gaian ümmeßüß meddn Aoto mettnihm’n loätt, oabba maia! –

Vogohn Häabwst hadde ßuin Noahba Fretz ’n düht foöa Grammen laht. Hoä was uilig noa Hius, dänn datt Gewidda, datt an’n Hebn hoäl, kamm haroaba. – Un niu äok datt näo. In dä Uile hadde hoä wall nich ßäo schahp uppaßt, un datt oäne Ächtarad glappe van’n Kruipa in’n Grabn. Datt Foöa blaif oba Änne,  oabba hoä lagg faste. Un datt Giwidda kamm jümma noöga! Wänn hoät man just fiftig Trätt wuida unna dänn Uisenbahnbogen krihge! Oabba dä Pea kön’nt nich haln! – Doa kamm Hinnack meddn lihgen Wagen anjaget. Fretz roäp ühn an, oapp hoä wall nich just mett in’t Rad packen oadda vohangen könne. – „Nai“, roäp Hinnack un gaff dänn Pean medda Schwihbn watt achta vo, “nai, eck mott uiln, datt ech druige noa Hius kuhme. Ett gifft gluiks’n Giwidda!“ – Un wege wasse!

Fretz hätt ßuin Foöa Hoä näo vo dän Regen druige unnan Bogen krihgen. – Dä Aboädas, dä just Fuiaoahmd mahken, hedden maia Vonimm. Szä spihgen inne Hänne un packen inne Spaiken un hülben Fretz iuda Näot. – Oabba vigihden hätt Fretz ßuin’n Noahba datt nich! – „Datt dräpp ßick moall wia!“

Fretz woll noan Tichelwäake un woll ßick ’n uinge hunnat Pannen hahln. – Unnawegens ßäog hoä, datt doa oäna meddn Foöa Backstoäne fastelag. Noa, doa mosse hulben waian. – Oabba nai, datt was doach Buskgraibn Hinnack?! – Joa, hoä wasset! – Fretz hoäl in, blaif oabba ubbn Wagen ßidden un kaik ßick dä Gäolackaruigge an. – Nai, datt können dä boädn Pea nich schaffen! – Ett dua äok nich lange, doa kamm Hinnack an un behdel un günsel Vospann. Just doaupp hadde Fretz luat! – Watt hoä nui dänn Hinnack oalle uppt Bodda schmeat hätt, datt ßall huia nich votellt waian. Niu was fo Fretz dä Schadnfroöde dä schönstn Froöde!  Un datt kann eck geot vostoahn!

Äok huia kam’n Tröppken Aboädas upp düssen Buiwaia teo läobn. Szä wolln gluiks oalle mett inne Rea packen. – Doa oabba sprang Fretz van’n Wagen: „Wänn huia oäna mett teopacket, dänn gifft ’n Klopparuigge!“ – Un niu votelle hoä dän Käals, watt ßuin Noahba von’n „geon“ Minsken woöa. – Oalle blihbn stoahn un froöggen ßick met Fretz, oasse Hinnack niu ßuine Stoäne ganz oallaine afflahn mosse, ümme wia läosteokuhm’n. – Wick Hinnack dä Backstoäne wia ubbn Wagen krihgen hätt, datt woät eck nich. Datt wusse Fretz äok nich. –

Oapp dä Bichte, dä hoä ßuin’n Noahba lesen hätt, ubbe Dua hulben hätt?! –