Hinnak essn äolen Lichtschinken

von

Heinrich Ottensmeier

 

Muine loäbn Noahbas un Frünne!

Wänn eck Ji votelle, datt ett lichte Lui giff inna Welt, dänn eß Ji datt nicks Nuigges. Un dat't düsse Lichtnträas nich bleoß inna Stadt giff, ßoannan äok bui uß ubbn Lanne, datt wihde Ji äok ßümß oall. Oabba wän'n dat ßüt un builihbet, datt äole vostännige Lui, dänn man ßäowatt ganich teotriut, näo wi Wuind un Fean ßind, dänn kümmt man doach nich maia mett! - Datt sticket joa wal ßäo an wi dä Fruisel oadda dä Poggen! Un niu äok näo - häolt Ji doanne - dä äole Brinkhinnack !

Eck hadde van Hinnack oall länga Tuit nicks hoäat oadda ßoän. Oapp höä wall nich geot teo Gange was? - Oasse wui dä Katuffel in 'n Kella un dä Runkel in'n Bülde heddn, namm eck mun 'n Gängastock inne Hand, ümme bui dänn äoln Knast moall wia Ansproake teo häoln.

Oasse 'eck ubbn Brink kamm, blihke dä Rui, un ett dua nich lange, däo stacke Brinks Ambrui dänn Kopp düa dä Nihndüa-Leoke, ümme dä Düa dänn mett lachen Muin'n wagenwuit uppteoruidn. Ambrui gloah oassen Leggehoänken. “Luid, diu häß di oabba geot vohalt! Diu ßüß joa iut wi dä Stadtlui, wänn dä iut üan Voloäf van'n Wahda oadda iut dä Bäage wia noah Hius kuhmt!” - Brinkske lache iut vulln Halse: “Woarümme ßött dä’t dänn behda häbbn oasse wui? Wui könnt doach äok moall inne Bäage foöan,” - Joa, Ambrui kümmt äok oallhand ubbn Mundvull nich an. – “Oabba niu ßegg moall, Ambrui, watt mahket dänn oänlick duin Hinnack: Hoä  eß doach nich krank? Eck häbbn ßäo lange nich läobn ßoän.”  “Oach, krank esse just nich, oabba hoä mott ßick niu oäast van ßuin'n Feangen (Ferien) vohahln.” -Niu woch eck oabba doach niuschiach. - Ambrui mahke dä Stohbndüä upp un ßeä: “Niu goanka man upp, dänn kanße di mett Hinnack ßümß watt votelln. Eck mott just dänn Hoähnan watt hänschmuidn.”  Hinnack schmait just dä Boäne van'n Soffa harunna, riske ßick upp un rait met ßuine Fuibe düa ßuine widdn Bössen. Oabba nai, dä ßäoch nich iut wi oäna, dä ßuiket un nich rächt teo Gange eß. –“Noa, diu äole Gast, diu nimms di oabba vomuckt lange Näone! Un dä gifft teo düssa Joahtuit obahiupt nich maia!” – “Oach, Otto”, ßeäHinnack, “datt hätt mett Näone nicks teo däon. Eck ßinn inna Noahkua! Szui, dä Noahkua, datt ßall joa van ßoanna Kua jümma dat bäste ßuin. Un datt nihme eck niu doavan. Un dänn kost dä doach äok datt woänigste Geld!” -Hinnack gnicka un gnoäse obat ganze Gißichte. –“Oabba Hinnack”, ßeä eck, “duin Ambruigesken hät ebn voda Nihndüa äok oall ßäo spoassig küat, niu loatt diu doach moaln Woat in'n Vostanne mett di küan. Szinn ji dänn niu wüaklich teo Kua noa Önnhiusen oadda noa Iufel wesen?” –“Oach, Otto, woa dänks diu hän? Datt eß doach bleoß watt vo lüttke Lui. Nai, wui ßind in dä häogen Bäage wesen! Wui ßind in dä Alpen wesen. -Jäa, niu bisse vanne Szöcken, watt?” –“Nai, Hnnnack, man ßollt giwisse nich loäbn, oabba eck woät, datt dui niu moalln äoln Unducht un Lichtschinken biß! Di kann man doach oalles teotriun! Un doch ßoll mant nich loäbn!

Nui loät Hinnack ßick oabba nich maia häoln; „Minske, Otto, wänn diu datt ßümß builihbet hetts, dänn kihkes diu iut annan Äogen“, briuse Hinnack läos. „Ambrui un eck mett dä boäd,n lüttken Stundentn heddn uß teo ßoanna ,Freizeit' noa Bayern anmält. Eck wusse äok nich rächt, watt datt an'n Szinne hadde, oabba man mott doach moall oalles iutproboäan, buißoannas, wännt nich oallteovihl Geld kost. Von Herwesken Bahnhobe stöä’n näon ganze Ruige ßoanne lichte Famuilgen mett Kuind un Kuiken un stihgen mett in dänn Onnibus in, dä uß inne Bäage bruingen ßoll. Datt eck dä Öllste vann düsse Lichtfittke was, kannße di wall dänken. Un däo woch eck äok näo "Transportführer". Junge, däo was ßoann äoln Feldwebel wia ßäo richtig in'n floädn Wahda! Wännt moe äck nich ßäo rächt wall was bui dä vihln Freoslui un Kinna, oabba eck häbbe ßä doach oalle teo Oat un Stih krihgen. Joa, dänk moall an, bui Nacht un Nihbel ßeßtoäggen Stunne in 'n Onnibus! Oabba, Otto, man ßoll ganz inne Buistaruigge kuhm'm, wänn man ßäo teo ßoän krech, watt von Dahge inna Welt läoß eß! Dä Lui mahket. dänn Szunndach teon Oalldach un dä Nacht teon Dahge! Upp düsse Autobahns ßind bui duistan wall maia Lui unnawegens oasse bui lechtn. Un dänn näo oalle uilich! Oapp datt ubbe Dua geot goahn kann?

Eck häbbe bui düsse ganzen Jagaruigge kain Äoge teokrighen. Oabba watt eck doa oalle teo ßoän krihgen häbbe, datt kresse huia ubbn Szoaltwäake nich teo ßoän! Diu kanßt äok nich loäbn! Datt goät an Spoökaruigge; - Bui ßoanna Tankstih woln Ambrui un eck uss’n bihdn dä Boäne voträhn. Ambrui hadde wall Dost ubbn Köppken Kaffee, un eck hedde äok nich nai doateo ßächt. - Joa, oabba middn inna Nacht? - Däo blaif Ambrui vo ßoan'n Kastn stoahn, kraich 'n Fuifgroassenstücke iuda Tasken un stacke datt doa in. Eck wollt näo truiggehäoln, oabba teo lahde! Däo fänk datt in dänn Kastn an teo rappeln und teo grummeln - un vo uß stoand’n Giloat mett Kaffee, wi bui „Tischlein, deck dich!“ Diu glöäfs datt nich? Eck woll düssen Spoäkaruigge äok nich woah häbbn, bätt Ambroi moe dänn Kaffee teohoäl un eck moe bäole datt Miulwäak vobrännt hedde. Un dänn gaff dä Kastn näon Szülbagroassen wia truigge! Niu was eck van Hinnack ßuin'n Votelln bäole buidoänt! -Oadda watt moäne Ji doateo?

                                                                                       Jiu Otto van'n Stickdoäan

 
 

pdf-datei