Muine loäbn Noahbas un Frünne!

Eck hadde oall maia van « Goldner Konfirmation » watt in'n Szunndachsblah un inna Zeitung lesen, oabba woa schön datt eß, datt ßinn eck doach niu oäast giwoah woan! Joa, wänn man ßüms doa mett buigge eß! Eck was doach vo voätoäggen Dahgen teo muina oägen Goldn Konfamatscheon noa Gäobel inlaht. Nai, man ßollt doach ßüms bäole nich loäbn, datt datt oall fiftich Joah hea eß, datt uß Pastoa Ordelheide un Pastoa Brüngcr konfamiat hätt. Oabba man kannt truigge un föäabels rehken, ett kümmt doach jümma wia hän.

Doa häbbe eck dänn 'n Szunndachmoahn tuitljcks mett muin’n Hannchen ubbn Patt noa dä Goäbelslken Käaken mahket. Datt was doach oalln Ruigge Joahs hänn, datt eck doa hännewesen was! Junge, dä Wäch kamm moe doach länga vo oasse däomoals!

Oasse wui von Gimoänehiuse ankoähm’m, konn man bäole düa dü Autos nich düakuhm'm. Hannchen wast doach bäole ganz teo noah, da wui jümma näo  geot teo Feode ßind, oabba oasse wui ubbn Truiggewege bui geon Noahbas äok achta in ßoahn'n Wagen liggen kön'n, däo hadde ßick dä Kumma hicket.

Von’n Gimoänehiuse stoand doa oall ßoann Tröppken teohäope. Upp oänmoal kamm doa ßoan gräodn Käal upp meo teo, drücke un kneh moe dä Hand bäole ganz teo Schanne, lache un wunnawäake un hedde moe vo Froede bäole in'n Ahm noahm'm. Oasse Hannchen moe noahea froage, watt datt von Minske woöa, dä mosse eck buikin'n, datt eck datt ßüms nich wusse. Oabba düht mettfroögget häbbe eck moe doach! Eck moäne, man ßoll doach äok ßülbane Konfamatscheon fuian, dänn wösse man ßick doach nich ßäo iuda Kunne!

Loäbe Tuit, nai, watt was datt von froöhlicket Wiaßoähn! Doa kamm ßoann Hoppa in widdn Hoan upp oän'n teo,  doa was oäne, dänn was dä Kopp flöadda. wossen oasse dä Hoa, doa lache oän'n  'n Homma medda widdn Schoän teo, un doa koäm'm twoä meddn Stocke. Joa, watt woöan dä doach äolt woan! Lüttke Fäoln un doäpe Nahbn hadde dä Tuit in dä Gißichta grabn. Oabba, iut dä Äogen schain doach oallawegen dä Szun'n! Doach frisk anstrihken was doach kain uinziget Gißichte. Datt hadde kaina noädich!  Szä woöan oalle in üan Oalla näo  schlicht un wacka!

Un oasse wui äoln Kumpels,  Schmihs Hinnack un Gahls Fretz, Ortmoäs Fretz un Mühlnmoäs Willem un watt doa ßüß näo te häope hoäa, van früa votelln, dä buigrihbn wui doach, da wui just oasse dä annan niu bui dä Äoln hoäan! Un oasse noahea näo Goänas August Billa iut dä Scheoltuit wuise, dä wüssen wui, datt bui uß äok dä Muddn inneßit't, datt in dänn äolln Holde doach dä Wuam inkuhm'm eß! Un dänn bloasen uß dä Bloasas inna Käaken. Dänn maisten woch doach wia ßäo woäk un ßäo ßoannaboa teo Meo oasse vo fifftich Joahs. Wui koäm’m just nich wia uppt Koa, dänn inna Goäbälsken Käaken hättße kain Koa maia, oabba wui ßoögen niu doach, datt doach ßäo vihle failn! Twoä Kruige hätt gräode Löäcka rihdn! Oabba äock ßüß ßind Krankhoät un Däot nich vobuigoahn! Van dä 141 hätt just näo dä Hälfte watt van ßick hoäan loadn, un  ungifaia  fifftich  woöan  kuhm'm. Un doafo mö wui  iusen Häagott näo dankboa  ßuin.

Dankboa oabba was äok woll joäda doafo, datt ühn iuse Häagott näo moall Tuit gihbn hätt noa dä Goldn Konfamatscheon ßuin’n Lihbnsspruch, dä ühn fifftich Joah lett hätt, niu in’n Oalla oäast rächt oasse Stüdde un Hülpe teo briuken.