Muine loäbn Noahbas un Frünne!

Man ßollt vomuckt oallhang nich loäbn, watt inna Welt passiat! Un wännt äok bleos bui uß ubbn Lanne eß! - Un wänn oäna van Ji düsse Gischichte nich woah häbbn well, dänn mott eck ßeggen, datt Keohkamps Alma fo joadet Woat geot ßägg! Un Keokamps Alma, datt lügg nich! Oabba eck ßegge joa, man ßollt nich loäbn! Oasse moe dä Keohkämpske ’n Szunnoahmd üa Hachte iutschüdde, konn ett näo nich achtan Oahm kuhm’m un schläg jümma wia dä Hänne teohäope un roäp: „Nai, man ßollt nich fo möglich häoln!“

Doa woöan doch düsse Dage van iuse Vowandtn vanna annan Szuit (die Engländer) huia an’n Manöbarian, Kinna, nai, datt günk teo dä doamoaligen Tuit, oasse eck Kommißbräot edn mosse, doach’n bihdn annas teo. Oabbe ßäo wi dä datt maket, heddet moe äok wall beda buihaget! – Wecke van düsse Gäste maken Nachtschicht un kön’n bui Dahge harümmedängeln. Datt hett oänlick soln ßä ßick wall ressen! Uinge drihbn dänn Dagg oba „Heimatkunde“ un „Erdkunde“ upp iusen Buanhöbn. Un wännt huia bui dä „praktischen Völkerversöhnung“ oallhand nich stukeln woll, wänn datt Mundvodraiggen un äok dat Häochküan un datt Plattküan nich wänne, dänn namm man Hänne un Foöde teo Hülpe. Datt hett, huia mett Loäbe! – Un dä Jungens können äok watt anpacken! An Aboät failt ett joa ubbn Lanne nich! 

Bui Keohkamps hadde ßick äpk ßoanne Hülpe instellt! Noa, ßä hätt man’n hännige Goäda, un in’n Ümmedraiggen hadde Alma mett ßuin’n Kostgänga oalles inne Fissen broacht Un’n Szunnoahmd was Alma rutsken iude! Oabba ßäo ganz ümmeßüß woll ett dat Froöstücke un datt Middag äok nich liban. Un dä Minske moche ßuin Foa! Äok, wännt Düananna gaff! Datt mott doa doach wall näo van däomoals inneßidden! – Alma kamm niu’n klüftigen Gidanken! „Dänn waiat iuse Deel moall oänmoall iuda Ruige schrubbt!“ – Muin loäbe Tommy mosse doatäo datt Wahda iudn Szäo wuin’n. – Oalles güng ßuin’n Gang, un datt Wahda fläot hännig nihniut!

Upp oänmoall kümmt muin loäbe Tom ohne Ämma un Wahda wia! Mett Mund un Hänne vostücka hoä Alma, datt ühn dä Kihn affrihdn woöa un mett dänn Ämma in’n Szäo loäge! – Oach, doa ess wall wia anteokuhm’m! Woateo hätt dänn Noahba Briutkamp’n Szäotßoöka! – Tomm hadde niu just mett ßoanna „Waffe“ näo kaine Iutbildung hatt, oabba Alma hätt etwas Anloage teon Fäldwebel, un bäole konn Tom oasse „Richtschütze fo Ämmaßoöken“ inßet’t waian!

Keohkämpske kraig niu’n bihdn Unnlucht un kraig tänga datt Froöstücke ubbn Disk. Noada Wuile, ett hadde äok’n düht Stücke Schinken vanna Roäkabühn’n halt, woll ett ßuine Hülpe dänn teon Froöstücke reobn. Ett kaik iudn Finsta, oabba kain Tom was teo ßoän! Äok in’n Hiuse was oalles stille! Niu kraigt Alma oabba meddn Blassen! Dä Minske  ßall doach wall nich in’n Szäot fallen ßuin? In’n Galopp ßiuse Alma iuda Iutlucht noan Szäot. Just wollt doa harinruiken, däo kamm doan Kopp meddn blaiken Geßichte hariut! Datt Keohkämpske schroägge upp un woöa bäole buischwocht! Oabba dänn rait ett ßick doach teohäope un namm tänga dänn Ämma mett dä langen Kihn, dänn dä Junge inna Hand hadde, an. Un dänn klaigge dä libännige Szäotßoöka iudn Szäo hariut. Szeggen konne nicks, säo aff wasse!

Oabba äok Alma bihbn dä Boäne! Buin’n Köppken stahken Kaffe koäm’m dä boädn lagßam wia täo Vostanne. Un niu buigraip Keohkämpske oäast richtig, wat passiat was.

Buin Szoöken hadde ßick dä Szäotßoöka achtan Stoäne fastehaket. Tom männe, hoä hädde dänn „Iutruida“ packet un draigge mett Giwalt anna Wuin’n, bätt äok dä Loädn affrait. – Un niu was Holland,  oadda äok’n anna Land, in Näot! Datt konn oasse „Sabotage“ iutleggt waian, un oalle „Völkerversöhnung“ woöa äok int Wahda falln! – Un doafo ßedde niu dä Minske ßuin Lihbn Uppt Spell? – Hoä hedde just ßäo geot däode in’n Szäo liggen liggen konnt! – Oabba mui well schuin’n, datt düssen Tom dä Völkerversöhnung doach echte Hachtensßahke wesen eß!