Muine loäbn Noahbas un Frünne!
Niu ßind doach oalle bui lüttken wia teo vostanne kuhm’m ! Datt woll eck ji oall vo acht Dagen votellen, oabba eck ßin doamedde nich teo Podde kuhm’m. Eck hadde muin’n Tall vull. – Oabbe ji hät’t joa ßüms oall mäaket, datt man niu mett dä Lui äok wia küan kann. – Ett was doach doll ! Un leßtn Änne bäßt datt dicke Oä ! Eck hadde jümma männt, datt woöa spihln wesen mett dänn Feotballe. Un buin Spihln mott doch jümma oäna voloäsen ! Datt wiht’t joa iuse Kinna oll un nihmt datt upp dä lichtn Schullan. Oabba dänn häbbe eck vonoahm’m, datt datt’n « Fußballkampf » was. Datt eß joa oll watt annas !
Oabba niu näomoal noan Brinke ! – Düttmoal was äok Bäoms Koal ganz ßinnig un vonünftig. Giwisse hätt hoä äok vo dä Flimmakistn ßedn, oabba int « Training » vo dä naigesten Weltspihle eß hoä nich wia anträn. Nai, nich doarümme, wail iuse Jungens in Ängeland dä Buide krigen hätt, nai, hoä lahme mett dänn oän’n Flunk. Hoä hadde ßick noa dänn Russenspihle vo acht Dagen dänn Finga vostiuket. – Szui, datt kümmt doabuigge hariut! Ett eß doach geot, datt eck „paassiv“ blieben ßinn! – Oabba wänn Hinnack bui dänn Doameln mett dä Kinna oall ßäo teo moade kuhm’m eß, wick müget dänn dä Jungens wall iutßoähn, wänn dä ßäo annathalf odda twoä Stunne harümmegeolacket ßänd?! – Oabba ganz uppstehken well Koal doach näo nich! – Moe ßall bleoß lüssen, watt man doa wuidahän näo van hoäat!
Un niu teo Hinnack van’n Brinke! Datt wiht’t Ji joa, datt hoä’n Lichtschwängel, datt hoä wi Wuind un Fean eß! – Datt eck äok just doa wia doa upp teo Moade läobn mosse!
Hinnack haddn Ackasmann.
Datt hett, doa kann bui suina lüttken Goöda äok just nich van küat waian! –
Hinnack ßaigge dänn Brink mett ßuin’n Böschungen un Oäbas mett Gräß in.
„Rasen“ hett joa ßäowatt vondage. doa draff dänn äok kain Stücke Voäh upp,
wänn datt Gräß äok neo ßäo lang eß! Datt mott joäde Wiken maigget waian, un
datt Gräß waiat oänfach wegschmihdn un vokuhm’m loaden. – Joa, ßoan’n
Wisklabbn wäll Hinnack niu äok nich häbben! Un datt maket hoä nich oallain,
nai, doa mott oannik ßoan Goäna meddn uinge Lui kuhm’m un mott datt
fäagmaken. Noa, düsse Lui vodoäntet joa lichta oasse iusaoäna!
Kocht un geot, dä Goäana hadde ßäo ollahand Maschuinaruigge mettbrocht. Un oasset niu ßäo lade was, dat dä Bälskaruigge mett dä Ängelännas läosgünk, däo kamm doch Hinnack mett Hannchen ßuin’n „Teewagen“ noa biuden foöat un hadde doa an’n langen Droah dänn Kwaddakastn ubbestoahn. Dänn foöa hoä niu vo dä Annewoänge buin Hiuse, un dä Goäna foöa ßuin’n Auto vo dä annan Annewoänge, un dänn günk dat Kaloöstan un Bölken läos! Oabba watt ßall man van Hinnack ßeggen? – Dütt was näo billiga, oasse wänn hoä dänn häogen Dachläohn bleoß vo datt Teolustan buitahln mosse! Datt ritt innne Buian, in’n Gelsbuil!
Un niu foäan Hinnack un dä Käals mett üa Maschuinaruigge upp un dahl, hän un hea! Niu konn dä ganzen Noahbaskopp biuden mett teolustan. Un Bäoms Ännecken namm datt äok buin Wochelwoän un Hacken wah.
Biu Brikhinnack güng datt äok oalle ßäowuit ganz geot. Bloaß wänn datt Libn un Bölken in dä Kastns oalls teo hadde woch, dänn goäbn dä Käals Lucht. Oäast maken ßä oalle n’hellet Geßichte, un ßoä män’n, niu heddn ßoä wall’n Schluck oadda Glas Boäa vodoänt, Oaba dänn wochen dä Käals jümmer fluidiga un kihken stua vodahl upp üa Aboät. Joa, un teoleßt loädn ßä oalle dä Oahns ganz hangen! - Iuse Jungens häddn dä Buide krigen! „Teo Unrächt!“ ßaä Hinnack. _
Häamkroögas Koögge krülln vondage dänn Staiat äok nich upp un loädn dä Köppe hangen. Moe kamm oabba bäole vo, oasse wänn ßä datt maia ümme dänn frisken Kloaban un ümme datt geo Gräß don heddn! – Oabba an dänn Voloäsen ßal wian Russe anne Schuld suin! – Oassewänn eck datt nich ahnt hedde!
Jiu Otto van’n Stickdoäan