Muine loäbn Noahbas un Frünne!

Oalle Lui hät’t vondahge uilig ! Un wäat nich uilig hätt, dä essen Fiulwams. Joa, ßäo eß datt vondahge. Eck loade moe joa ßäo hännig nich ansticken! Oabba buihäol oäna moall ßuine Riuhe, wänn oän’n just dä Omnibus vo dä Nesen wäggfoöan well! – Oänlick eß datt joa nich wia muine Schuld. Wänn eck moe tuitlicks ubbn Patt mahket häbbe, dänn loät dä Omnibus upp ßick luan, wänn’t moe oabba moall’n bihdn knappe woan eß, dänn hätt dä Kutska datt Uilige ubbn Luibe! – Joa, dä äoln buikannten Kutskas kuiket oäast jümme ümme dä Halbe, oapp eck nich näo andrabn kuhme, oabba dä nuiggen stoöat ßick an nicks. Oabba eck kann doach äok nich jümma ßäo freoh, oasset muin Schwaigavah doä. Dä broachet oallhand fäag, datt hoä näo’n Zugg oäa foöan konn oasse hoä oänlick vohadde. Oabba datt hätt äok nich jümma datt Geo!

Eck mosse volihdn noa Min’n ant Girichte. Ji wiht joa, datt kann ßick oallhand düht hänledden. Oabba düttmoall rait ett hännick aff. Dä leßte Tamuin fäll iut. Szäo kraich eck tuitlicks Fuiaoamd.

Ubbn Bahnhobe kaik eck moe oäast näon passigen Zuge ümme. Joa, in geot droäväal Stunne foöa oäna in Richtung Önnhiusen. Eck woll oall upp dä Luastuhbn, in dänn „Wartesaal“ goahn, ümme muin Bodda teo ehdn, oabba doa mott man oall’n Köppken Kaffee oaddan Glas Boäa buistelln. Un eck ehde muin Bodda oall ßuit Kinnaboän’n jümma gaian druige, un dä Pänge hege eck äok gaian. Oasse eck ümme dä Ecke glumske, noan drüdden Bahnsteige, ßäog eck, datt muin Zug doa oall hoäl. Bläoß’n Maschuin’n wassa näo nich fogge. – „Datt paßt joa geot!“, dache eck, staig in, mahke ett moe in oäna Ecke buikwaime un votia muine Boddas.

Noa na geoen Wuile koäm’m äok anna Lui, kwalm’m dä Bude vull, loäsn dä Zeitung oadda unnahäoln ßick. Upp oänmoall gaffet’n oanicken Ruck, doa krihgen ßä datt Peat von Wagen. Hoä ßoppe oäast’n bihden truigge, wi datt bui düsse Doamppeas ßäo Meode eß un teog dänn an. Nai, datt doä ebn nich! Hoä blaif an’n Truiggeßobbn! Dä was vomuckt nich zugfaste! Un dä droaffe joa äok näo ganich int Gischia goahn! Szäo lahde wast joa näo nich! – Oasse eck düa dä Riudn noa biudn kaik, ßäog eck, datt dä Bahnstaig jümma uiliga an uß vobuifoöa. Oabba inne vokaidn Richtung! – Eck was doach wall nich in’n vokaiadn Zug stihgen? Dä annan Lui blihbn oalle stille ßidden un kaian ßick an nicks.

Eck stacke niu muin leßte Bodda ruhig wia inne Tasken. Ett woall moe doach nich maia recht schmicken! Oabba ßüß loät eck moe nicks ankuhm’m. Un niu kammt moe äok ßäo düan Kopp oasse wänn doa buin Affoöan’n Schild „Nienburg“ an us vobuirutsket woöa! Oach diu loäbe Tuit, ßall eck dänn niu an’n Änne näo Nienburg doampen?! Man bleoß nicks mäaken loadn, ßüß hädde eck äok näo datt Iutlachen!

Niu draigge dä Kutska upp oänmoall bannig an. Szoll hoä niu doach doa achtakuhm’m ßuin, datt hoä ubbn Holtwege was?! – Meddn oanicken Ruck hoäl hoä an. Was datt dänn oall wia’n Bahnhoaff? – Joa, doa stoand „Dankersen“ ubbn grädn Schille. Noa, niu oabba nicks wi hariut! Dänn kamm eck doa vilichte näo uingamoadn geot wia vanaff! Un eck briuke äok nicks fo düsse Äckstrafoaht buitahln. Dä Podn stoan ohbn un kain Minske was teo ßoän!

Kium hadde eck datt Truiggespoa noa Min’n ßocht, doa kamm äok oalln lihgen Omnibus bui moe hea. Dä namm moe mett un inna lüttken halben Stunne stoand eck wia in Min’n upp „Bahnsteig 3“. Oabba muin Zug noa Önnhiusen hadde datt Luan upp moe äok vodrutt! Hoä könne niu wall just inna Porta ßuin! Oabba in annathalf Stunne foöa wia oän Zuch noa doa. – Hedde dä anna ßick doach nich näo’n bihdn hänledden kön’n? Oabba eck moasse niu luan un kraichen lahdet Nachmisse.

Oabba doafo flöttke eck dä Uisenbahn moal wia an. Dänn toöbe eck nich ßäolange ubbn Zug. Dänn goah eck oänfach teo Feode. Datt hett, wännt just nich ßäo wuit es oasse van Min’n bätt noahn Szoalwäake.