Datt Hachte goät meddn Vostanne düa

von

Heinrich Ottensmeier

 

Muine loäbn Noahbas un Frünne!

Mett dä Autojagaruigge nimmt dat oänfach oabahand. Un buißonnas niu, woat wia teon Szomma goät! Oalle Lui hät’t uilig, un mött’n Auto häbben. Szüß kuhmtse nich maia teo Podde! Oabba datt kann joa wall doach nich dä rechte Grund ßuin, ßüß mössen doach Szunndags dä Ströädns lihch ßuin. Oabba inne Fuiadage oadda an’n Szunndag kam’m joa kium oab dä Stroade kuhm’m, gischwuige dänn ’n Schua ubbe langes goahn! Doa mott man ßick joa oalle Äogenblicke achtan Bäome buihuin. Nai, dänn hätßet oalle näo vihl uiliga! Kann datt dänn teon geon Änne foöan?

Un dänn dä vihln Freoslui achta dänn Stuiah! Hoäat dä doahän? – Dä hoöat buin Pott un bui dä Kinna! – Giwisse man hoöat fahken, dä Freoslui foöan ßinniga un vonünftiga! Datt will eck joa äok nich affstruidn! Oabba wi eß datt dänn mett dänn käohln Koppe un käohln Bleo, mett dä „Geistesgegenwart“? – Eck woät’, eck woät’t! Dä Freoslui ßind vondahge „gleichberechtigt“. Geot un wall! Früha kön’n dä Stadtfreslui kain Bleot ßoän, kain’n Bleotnapp roöan, kain Häon mett schlachen. Bui ßoanna Aboät oadda buin Unglücke oadda bui gräode Woähdahge wollnse inne Hain goahn, mahkense schlapp, buischwöchen oadda felln in Ohnmacht! Doarümme kön’n dä Freoslui joa äok nich mett in’n Kruich goahn!

Oabba niu mett dä „Gleichberechtigung“ eß datt oalle wege! Oapp niu dä Käal in’n Lasteniutgluik schlicht ümme schlicht van dä Freoslui mett obanihm’m mött. – Eck loäbe ßäo ganz in’n Szichan ßind ßick dä Käals mett „gleichberechtigten“ Freonsluin äok nich jümma!

Muin Junge hätt ßick vo länga Joahs äok’n Auto anschafft. Eck mott joa ßeggen, wänn eck doa mett inneßidde un upp düsse billigen Wuise oak moalln Autotur kruige, dänn ßütt datt oalle ’n bihdn annas iut. Dänn häole ech äok oall truigge mett dä Nükaruigge oba dä Autokutskas un schelle mett oabba dä „blöden Fußgänger“. Niu mott eck oabba ßeggen, datt dä Junge jümma vonünftig foöat, woänigstens wänn ecka mett inneßidde! Un dänn eß dattn Vognoögn, ßäo düa dä Gihgend, düa faila un Büske teo foöan!

Oasse dä Junge fruigget hadde, stelle ßick bui ühn dänn hännig dä „Gleichberechtigung“ in, ßuine jungen Frübbn mosse äok’n „Führerschein“ häbbn. Un watt ßall man doa niu oalle van ßeggen? – Dä Lui inna Stadt mött joa oallns oba dä Wichte hahln. Wänn dä buin Kaffeediske ßit’t un hätt kaine Mäalka, dänn jaget ßä just meddn Auto hän! Un wännt ’n innlächtn Hairing oadda ’n Pund Szucka oadda Szoalt ßuin mott, dänn waiat datt meddn Auto hahlt! Dä Moäm’ms mett lüttken Kinnan briuket nich moal ’n Kinnamehken. Dä Blagen waiat mett in’n Wagen packet un mahket dä ganzen Roäse mett!

Kocht un geot! Muine Schwaigadochta staich int Ecksamen fo dänn „Führerschein“ un kamm äok gluiks datt oäste Moall düa! Datt ßoan Luid dänn düht stolde eß, kann man wall vostoahn. eck was joa ßümß stolde mett. Noah Vespatuit troane ett dänn Jungen dänn Wagen aff ümme ßick tänga bui dä Moäm’m in Buine oasse nuigge „Führerin“ voteostelln. Datt güng äok oalle geot, Matille was äok düht stolde upp ßuine ainzigen Dochta!  Bui Nachmissetuit staich datt Luid wia in ßuin’n Wagen, ümme no Hius teo foöan. – Oabba könne man niu nich just äok dänn Hoppa ubbn Stickdoäan Dagestui ßeggen? Datt eß joa meddn Auto man’n Ruck.Un eck mott ßeggen, datt eck moe düht froögget häbbe. Wui hätt teohäope Nachmisse gihdn, un es was oalln bihden in dä elften, oasse muine gräodn Dochta affdompe noa Builefeld.

Dä Junge hadde oabba in ßuina Szoage in Buine anreobn. Oasse hoä hoäa, datt ßuin Schatz oall ümme ßihbn affoöat was noa Hius, roäp hoä ümme toäggen oalle Polizeistihn tüsken Builefeld un Buine an, oapp doa wall’n Unfall mäld woöa. – Woa freoh was hoä niu, oasse hoä ümme väahl vo elbn ßuine „gleichberechtigte Beifahrerin“, wänn äok mett etwas Muan, wia inne  Ahms nihm’m konn

                                                                                      Jiu Otto van’n Stickdoäan

 
 

pdf-datei