Muine loäbn Noahbas un Frünne!
Eck häbbe jümma hoöat, wänn dä Lui aiag oadda vorückt wöachen, dänn fänget in’n Koppe an. Oabba bui watt Luin ßallt inne Boäne schoädn, dattße an teä läobn fanget. Un dänn giffet näo Minsken, dä hät’t in’n Koppe un in’n Boän’n. Un van düssen Luin giffet ungihoäa vihle! Datt häbbe eck in dä leßtn Wihkens ßoän un builibet! Eck häbbe gloafft, dä Tuin loägen oall twindig bit däachtig Joahs achter us, woa dä Minsken bui us sick buinoäm’m oasse wännse nich rächt doana täobacken woöan! Un niu hät’t iuse „Befreier“, dä jümmer män’n, ßäowatt könne bläos us Duitsken obakum’m, äok packt. Oabba niu eß joawall dä ganzen Welt vorückt woan! Vorückt ubbn Feotball! Un wänn doa niu kein Änne in kuhm’m woöa, dänn heddnse mui äok näo düahea maket!
Eck dänke joa nich bläoß an
dä droäntwindig Mann, dä in Ängeland achta dänn Balle hea schuidbücksen
mössen, bätt daddn dä Tungen uidn Halse häng, dä ßick bui düssa Balgaruigge
un Bräoseluigge dä Knoken teoschanneschlügen, dä ßick gigenßuidig in’n Biuk
in in’n Ähß troampeln. Eck moäne äok nich bleos dä vihln Lichtschinkens,
dänn datt Geld ßäo loasse inna Tasken ßatt un oba datt Wada foöan un ßick
düsse unwuisn Werke ankiken, dä krajoölt un bölket hätt, oasse wän’n oäna
datt Mäßt anna Strohdn ßedn hedde. Eck well äok nich bläoß van dä Manslui un
äok Fruislui küan, dä medd’n Kasten Boäa oadda medda Schluckpulln an dänn
Kwaddakastn oadda dä Flimmakistn ßiddgoahn ßind un noahea nich maia ubbn
Boän’n stäohn kön’n un näo acht Dage hoästag woöan. Nai, eck moäne Lui, dä
eck ßüß jümma fo vonünftig un vostännig häoln häbbe.
Doa kamm eck doach vo voäatoäaggen Dagen ßäo noa Väspatuit noan Brinke. Eck woll bui Hinnak moall wia Ansproake däon. Giwisse eck häbbe dänn äok bui Hinnacks mettkrihgen, datt iuse Jungens in Ängeland gigen dä Russen Feotball spieln mössen. Noa, datt konn moe niu just äok nöämd krumm nihm’m, datt eck doa äok mett oän’n Oah teolustat häbbe un mui äok düt froögget häbbe, datt iuse Jungens dä Russen teoda Bucht krigen hätt. Eck mag dä Russen niu oänmoall nich rächt luin! Oabba doa briukt man doach nich ßoann Mallöa ümme maken!
Oabba, Kinna, nai, watt krihgen wui teo ßoähn, osse eck mett Hinnack vo dä Düa günk! – Nich bläoß dä Minsken heddn ßä mett üa Schroäggaruigge un Bölkaruigge vorückt maket, naai, äok datt Voäh heddn ßä mett ansticket! Häamskroögs Koögge, eck loäbe ett woöan walln Stücka achte, dä heddn dänn Staiat uppkrüllt un ßackenaiggen upp dän Droäsken upp un dahl, un osse dä Woäde nich maia gräot gineog was, güg’t düa dänn elektrischen Droaht in dä Failas harin. Un datt, oalls, wail iuse Jungens gigen dä Russen gewun’n heddn! – Nai, eck moäne, datt günge doach wall täowuit!
Un
niu kaik eck dänn bui Hinnack äok moall ßäo ümme dä Hiusecke. Oach, diu
loäbe Tuit, doa was Bäoms Koal doa upp ßuin’n Gräßpläcken in’n Goahn, mett
dän hoä ßüß jümma ßäo oägen eß un dän ßuin Annecken jümma ßäo heget un
fleget, doa was dä Minske äok an’n Feotball trähn! Hoä hadde ßick ßoann pah
lüttke Studentn hahlt, dä Ühn dänn Ball dänn äok wiahaln mössen.
Oasse hoä mui giwah woch, roäp hoä, eck ßoll doach moll oban Tiun kuhm’m, üa faile näo oän Mann, eck ßoll doa in datt Doar stäohn goan. – „Nai, Koal“, roäp eck, nai datt kannße van moe nich volangen. Szäo jung un gilenkig ßinn eck upp muine äoln Dage niu äok just nich maia, datt eck dänn jümma rächta Tuit ubbe Halbe sprünge, wänn diu an dänn Ball traampels. Ett könne jao angoahn, datt diu mui droöbs, un dänn loäge ech ubbn Ruigge! Nai, doamedde bluif mui van’n Halse! – Un ßuih, Koal, datt hätt fo di joa äok kain’n Zweck maia! Bui dänn naigsten Spelle in acht Dagen stellt ßä di doach nich maia in! Un bätt täo dä annan Weltspelle hätt datt joa näo voäa Joahs Tuit.
Jiu Otto van’n Stickdoäan