Muine loäbn Noahbas un Frünne!

Niu ligget dä Fuiadahge achta uß, un datt äole Joah hätt ßuine Packebian teo-häopebun’n un well Affschoäd nihm’m. – Eck hobe, datt in Jiun Hachte un in Jiun Oalldagg äok ’n bihden ßidden blibn eß van oall dänn Lechte un van oall dä Loäbe un wuida in iuse duistan Dahge harinlüchtet ! Wui mössen doach äok noa Wuihnachen näo noäga teohäoperücken in Famuilge un Gimoäne, in’n Lanne un ubba ganzen Welt !

Wui mahket ubbn Lanne joa ganich ßäovihl Kuiaruigge oba dä Loäbe. Datt föllt man oall ßäo ! Un doach buikümmt moe datt hadde geot, wänn moe van Hannchen oadda dä Kinna ßoan ßoedet Woat ßinnig int Oah flüstat waiat ! – Un datt Danken fällt us äok fahken düht ßua. Woänigstens mett Woöan ! Oabba huia gellt dattßülbe oasse vanna Loäbe ! – Un dä lüttken Gischänke un Goabn küat doch äok fo ßick! Un dänn droä Fuiadahge ßött joa watt Luin äok nich rächt gifalln häbbn ! – Eck woät nich, watt dä Lui teo klagen hätt. Ett gaff doach oallawegen maia Gischänke un maia teo edn un teo drinken oasse noädig doä. Un meddn Wea günk datt doach aok hadde geot ! Un just wui äoln Lui kön’n uß doach äok inne Szun’n woagen. Giwisse, dä Kinna hädden doach loäba Schnoä hatt, oabba ßoä woöan äok ßäo teofruidn un froöggen ßick inna Froöh-joahsßun’n. Un wäa loäba achtan wahm’m Ohbn bluibn woll, haddet huia äok buikwaime un briuke kiume oba lange Wuile klagen.

Eck häbbe moe ’n „Film“ ankihken. Nich in ßoan’n richtigen Kino, äok nich in’n „Schlabbn“- oadda „Hoämkino“ oadda Fernsehen! Nai, ’n „Film“, in dänn eck ßüms mettspihlt häbbe! – Joa, datt was ßoanne richtige „besinnliche Stunde“! Un in düssen Film koäm’m äok Billa van Wuihnachen vo. Szall eck Ji doavan wecke wuisen?

Oach, ett ßind oänlick ßäovihle Billa iut muina Kinnatuit. Oabba do stoäht kaine Joahtall buigge. Oaba doa wassen buißoannas helln Wuihnachen 1920! Un woa eßt nich helle wahm, wänn twoä Minsken fott ganze Lihbn watt vosprehket! Doa hadde man doach datt Glücke faste bui dä Hand un konnt doannehäoln! Un oasse in düssen Glücke “muin Glücke“ unna dä Gischänke ’n ßümsbränntn Wandspruch schäof, doa passe moe datt bäole nich: „Bewahret einander vor Herzeleid, kurz ist die Zeit, die ihr beisammen seid. Und mögen auch viele Jahre euch vereinen, einst werden wie Minuten sie euch erscheinen.“ Un wi rächt was datt mett düssen Spruche. Oba fifftig Joah hätt hoä oall mahnt! Un datt Oalla hätt ühn äok düht mettnoahm’m! Un woavihl Herzeleid hät’t doach gihbn! Äok, wänn wui us jümma wia vogihben dröffen! Un oasse dä Szoäßenkäal us iudnannarait, doa woöant doach bläoß Maniudn wesen!

Un doa eß näo oän Wuihnachen. Datt was bäole twindig Joah läda! Wui loägen in dänn unwuis käoln Winda in Rußland! Nich wuit van Moskau, ganz ßuitaff vanna Rollbahn in ßoan’n lüttken Doape! Oach, watt häddn wui oalle fo Hoämwoäh! Un wui kihken oalle doahänn, woa dä Szunne achtagung!

„Doa achta, twoädiusend Kilometa wuit, doa ligg iuse Inne, doa ligg iuse Hoäme!“ – Un dänn wast stille. Dänn woäan oalle wuit wege! – In’n Hiuse! – „Oach, wänn doach oänmoall „Friede auf Erden“ woöa!“ – Oäna woll in basken Foöden noa Hius goahn, wänn hoä nich wuiakuhm’m briuke! Datt wassen Minsken iudn Rhuinlanne! Wui Wästfälsken buihäoln doch maia ’n käohln Kopp! Bui däachtig Groad Kuihle! Oabba iuse Hoämewoäh was just ßäo gräot!

Eck moäne, wui mössen us datt wia moall dänken hälbn! Un just in dä leßtn Dahge van dänn äoln Joah! – Oabba an dänn Spruch wi wui äok in’n nuiggen Joah dänken!