Watt Affgunst dött

von

Heinrich Ottensmeier

 

Muine loäbn Noahbas un Frünne!

Dä Kinna ßind vondahge joa ßäo klästag un ßäo läckask! Iuse boäden miuln buin Middage äok fahken oba dä Kribben. Joa, wännt Katuffelßuloat mett « Heiß-heiß » oadda Räotkäohl oadda düsse unwuislangen Niudel giff, dänn puiat ßä nich ! – Giwisse, mett dänn Pannkäoken, datt kann eck wall vostoahn ! Buin Pannkäoken kann eck äok schlächt hüngach buidennegoahn, ßäolange doa näo watt ubbe eß !

Oabba ßüß günget bui uß früha doach annas harinn ! Giwisse, Stängelroöbn, Stäckroöbn, Kumst un ßuan Käohl, lange Wochel un.... Hoalt! Wuida draff eck nicks upptelln! Wänn ßüß oänt van dä Kinna datt unna dä Äogen krige! Dänn woöat’t mett dänn geon Vobille vobui! Just ßäo oasse däomoals, oasse dä gräode Junge muin Tuignisse vanna Schäole in’n Kuffa fun’n hadde! – Oabba, nai, ßäo wi iuse, dä nich moaln oannicket Stücke Schinken edn witt! Hoächsten ’n Stücke van dänn widdn! Un eck könne moe van dänn räon just dä Hucke vullschloan! – Iuse Bracken witt doach oallhand nich moall dänn Budding edn, dänn Hannchen ßäo vomost koken kann! Muin Gräotvah wöache ßeggen, dattße oalle „dickefredn“ woöan.

Oach, joa , Budding! eck woät näo ganz geot, oasse wui iusen oäasten Budding krigen! Wui woöan näo ßäo ganz lüttke Duddn. Däo was upp Schwachten Hobe Hoachtuit! – Joa, dä boädn ligget niu äok oall lange upp Köstas Kampe! – Jäa, upp dä Hochtuit gafft Budding. Dä maisten Lui kinnen joa näo kain’n Budding. Un bui us ubbn Lanne oall obahiupt nich! Teon Noaedn an dä Fuiadahge oadda ubba Kinnadoäbnge gafft dicken Ruis mett Szucka un Kanoäl. – Oabba Budding! – Nai, dänn hedden wui näo nich teo schmicken krigen! Äok muin Greotvah kinne kain’n Budding. Hoä hedden äok bui oallen Teoküan nich anpacket! – Watt dä Bua nich kinnt, datt ädde nich! Oabba wui Kinna froädn wi dä Wülbe!

Un niu loäden wui iuse Moäm’m äok kaine Reohe maia! Szä mosse äok moall upp oän’n Szunndag Budding mahken. Iut twoä Päcksken, datt Stücke fo fuif Pänge! Datt gaffen ganzen Litta! Un wänn iuse Moäm’m näon bidn Woädenmehl teonamm, dänn wast neo maia! Un datt fo twöälf Minsken, dä bui uß teo Diske güngen!  Wui oäden teo dä däomoaligen Tuit näo oalle meddn hölten Lipel! Un dänn iut twoä Schöddels, dä middn ubbn Diske stön’n. Datt gaff bäole joädsmoall ’n lüttke Schlegaruigge. Doa kippe äok unnawegens ’n männiget Foöa ümme! Dänn Pattwägg vanna Schöddel noan Munne mahken wui oabba noahea ßüms wuia roäggen. Datt was dä „Reseve“, dä us kaina wägadde!

Iusen Äoln woch datt upp dä Dua mett iusen Buddinghoäthunger teo vihl! Vah loät ßick ßüß nich gaian an ßuin’n Geldbuil ankuh’m. Oabba niu gaff hoä noa! „Ji deot joa oalle oasse wänn Ji roäggen iutschüt’t woöan! Moäm’m sall niu oänmoall fo Füftig Pännge Buidding mahken! Ji ßött doach oänmoall oalle dänn Hals vull häbbn!“

Dänn nächsten Szunndag kam’m gräode Kumpschöddel mett Buidding ubbn Disk! Joäda droffe ßäovihl nihm’m, oasse hoä haia waian konn. – Un niu gafft kain Uiln un Struidn! Nai, oalle fängen ganz ßinnig un vonünftig an teo edn. Nai, datt was oall maia ’n Puian un Licken! Kaina hadde Uile un Drihbe! Datt ganze Edn hadde kaine Oaht un kain’n Schwung! Un ett dua äok ganich ßäo lange, däo leh oäna noan annan dänn Lipel dahl un was ßatt! Un dä gräoden Kumpschöddel woch lange Wuile nich lig. – „Kuik“ ßeä muin Vah, „doa kann man doach ßoän, watt Affgunst dött!“

Eß datt wall bui dä Gräodn äok ßäo?

                                                                                      Jiu Otto van’n Stickdoäan

 
 

pdf-datei