Muine loäbn Noahbas un Frünne!

Niu eß in'n pa Dahgen wia Moädach! Oabba watt wait vondahge näo ümme Moädach gihbn? - Früha koäm'm Moädach dä Koögge int Groäne. Moädach mosse ßick 'n Kraiggen in 'n Roggen buihuin kühn'n. Moädach mössen dä Poggen anfangen teo muan. Wänn dä Poggen moall teo uilich woöan, dänn mössen ßä ßäo lange noah Moädach wia schwuigen oasse ßä teo freoh kuhm'm woöan. - Oabba wä höält ßick vondahge näo an Moädach? Äok nich moall maia dä Poggen !

Oach joa, doa ßind näo düsse Blocksbäachjäga! Oabba doa waiat doach fahken bleoß Spitakel un dumm Tuich van. -  Dügenickske Straiche! - Oabba doamedde well eck nich ßeggen, datt früha oalles inna Oanunge wesen woöa! Iuse Vah kaik däs Oahms vo Moädach ßüms noah, oapp dä Wagens un dä Ploöge un dä Woldan äok unna Schua woöen un schläot dänn Schobbn äok ßüms teo, ßüß gaffet dänn annan Dach watt teo ßoöken. Dänn Wagen briuken dä Bängels 'vo üa Foaht noahn Blocksbäage. An Truiggebringen was nich teo dänken. In'n Szuike oadda in'n Duistadahle wasse fahken meddn Schupp affstellt woan. Un wänne dänn näo affraht un iudnannanoahm'm was, dänn hadde man Glücke, wänn man oalle Daile täohäopekraich. Nai, Jiugend. hätt kaine Diugend! Äok däomoals nich!

Oach, doa heddn doach oänmoall dä Dügenichta inna Moädachnacht bui Kläos 'n Wagen bobn uppt Fast ubbn Hiuse broacht! Un dänn heddn ßä dänn Wagen vull Mäß laht! Jäa, wi dä Rängels datt mahket heddn un mett woavihl Mann ßä doa oba teo Pea wesen woäan, datt mach dä Schinna wihdn !

Upp joädn Fall was datt kain lichtet Buawäak, dänn Wagen wia ubbe Aian teo kruigen! Un dänn näo Täagaruigge un datt Vonahnkruigen bobn teo!

Wänn wui vann düsse Tücke un Tände äok just nicks mettkrihgen hätt un äok kain Volöäf teoda „aktiven Mitarbeit“ krihgen, ßäo lustan wui uß doach datt Schwihbnklabbn an. Dänn Dach vo Moädach drücke uß iuse Knächt 'n Szülbagroassen inne Hand, un wui mössen ühn ubbn Truiggewege vanna Scheole toäggen Schwihbschnoösas mettbruingen. Un dänn günk 's Oahms datt Schwihbnklabbn läos! Un vann oalln Höbn woch truiggeklappt! Gewisse was datt just kaine „Kleine Nachtmusik“, oabba moe hätt datt doach behda lutt oasse dä Jeolaruigge un Schoädaruiggge, dä man upp watt Stihn vondahge näo hoäat! -Joa, bui dänn Fläohwagenfoöan woch äok düht klappt! - Oabba, wäa kann dänn vondahge näo klabbn?  

Früha hadde joäde Knächt ßuine Roätschwihbn in Schuß! Doa hoäa nich bleoß 'n oannick Schwihbruis teo, nai, doa mosse äok 'n oannick Schwihbschläch un'n geon Schwihbschnoa vogge ßuin! Bui dä Pea hoäa 'n Schwihbn!

Buin Foawäaken un buin Eggen konn man dä Schwihbn geot briuken. Nich ümme dä Pea teo schloahn, nai, teon Klabbn! Un eck moäne, wänn dänn anna Ecke klappt woch, dänn hedde datt behda lutt oassa vondahge datt Hupen! Un ubbn Lanne dänn' weddn ßick dä Knächte un Buanjungens in'n Klabbn! Upp bäste oabba kön 'n Kaims Hinnack und Kaims Koal datt Klabbn! Szäoga mett Dubbelschlach! Dä heddn doarümme äok düht Schlach bui dä Luidns! Doa kamm kaina medde mett! Äok eck nich! Eck häbbet dänn äok ganz teogihbn oasse eck moe oänmoall ßüms medda Schwihbn ßäo ümme dä Oahn klabbt hadde, datt eck acht Dahge 'n roahn Struim'm un acht Dahge 'n bläon Struim'm in'n Gißichte hadde! - Oabba doarümme eß Klabbn doach jümma näo’n wacka Landmußuik!