Muine loäbn Noahbas un Frünne!

Fredach schicke moe muin Hannchen noan Höka teon inkäobn. Noa, eck woll oäst nich recht, oabba ett troanne ßäolange, bätt eck teoßeä. Un oasse eck dänn langen Wunskßihdl inna Hand hadde, doa wusse eck Buischoäd, worümme Hannchen moe läoßkraich, dänn ’n Geldbuil doät moe nich mett. Un ’n bihdn luchthoach was eck äok. Eck niu äok moall ’n pa Stunne meddn lihgen Schwängel läobn! Un oän Fiulwams könne ’n Buanhof wall mett düa nihm’m, männe muin Vah oalltuit, maia oabba nich! Un dänn wast ßäo hoät, datt dä Kraigge ubbn Tiune vo Hidde jappe! Doa droffe in’n Kreoge äok wall just ’n Glas Boäa affaln!

Ümme datt Inkäobn ßümß kümma eck moe nich recht. Eck gaff Hökas Elli dänn Szihdel, un dat mahke moe oalles fäach un packe moe äok oalles in iusen gräoden Ahmkoaf. Eck briuke bläoß buitahln. – Gäste, Gäste, doabuigge ßänd mui oabba dä Äogen uppgoahn! Giwisse, dat ’n Mahksbräot vondahge maia oasse Mahk kost un dat’t von Szülbagroschen kaine voäa Stiudnbrötchen maia giff, datt wusse eck äok oall. Nai oabba ßoann Geld fo ßoann pa Daile! Eck mosse doach oalle muine Penge teohäopeßoöken, dat ßä moe man nich in üa Kudnluißen indrehgen mössen, - Un dänn froage dat „boäse“ Elli näo, oapp eck fo iusa Mama nich ’n Toafel Schokolade mettnihm’m  woll, ßä oäde dä ßoa gaian. Un ßä noähm fo moe doach äok jümma ’n bihdn teo schmoäkn mett.

Eck mott ßeggen, dat eck Hannchen bui muin’n Szuidnsprung in’n Kreog datt in’n Stillken äok vosproken hadde. Oabba niu jünket doach oänfach nich maia! – Eck konn doach kaine Toafel Schokolade anschruibn loadn! In’n Ladn kihken moe dä Freslui oalle ßäo schoäbe vanna Szuit an schüddekoppen oabba ßoan’n Guizhals! Junge, dä jüngen äok annas int Gischia! Buskmuinken koffe fo joädet Kuind ’n Toafel Schokolade. Szüß woöan dä Bracken nich tefruidn un struidn ßick, ßeä Muinken.

Oach, watt ßind dä Lui  vandahge doach lichte meddn Gelle! Un watt waiat dä Kinna doach vowühnt! Eck kann just nich ßeggen, datt wui in iusa Jiugend niu ganz „enthaltsam“ häoln wöchen, oabba woa dä Tropp Fäaken gräod äß, doa waiat dä Drank dünne. Ett konn wall moall paßian, datt iuse Vah buißonnas geot in Herwede ubbn Wihkenmachte affrihdn hadde, datt hoä moall fott Pund Boddan oadda fon ’n Dutzent Oäa fuif Pänge maia krihgen hadde, oasse hoä rehket hadde. Joa, dänn konnt ßuin, datt hoä uß fo fuif Pänge Bombom mettbroche. Oabba van dä Szochte, woat dä meistn Daile van Gaff! Oabba datt waß ’n Iutnahme! – Oabba wui häddn näo ’n anna Welln, dä schmait maia!

Oalle voäatoäggen Dahge kamm iuse Vedda Fretz un buißoche iusn Hoppa. Und ä voßumme nich, uß wat metteobruingen! Un joädet moall fo ’n Szülbagrassen!Un wui luan puilken, datt hoä dä Tiudn iuda Tasken kraich! Datt läohne ßick! Joäda kraich ’n Szuckazigahn mett widde Asken doaanne, oadda ’n Flötkepuibn oadda ’n Stücke Malzbombom. Oallhand oal moall ’n Stücksken briun’n Szucka! Un hoä voaßoage dänn ganzen Tropp doamedde.  Un fahken blaif äok näo’n bihdn oba, un datt stacke iuse Gräotvah inne Westentasken. Datt wassn stille Reseve fo dän, dät’t geot mett iusen Hoppa konn. Un eck konnt jümmer düht geot mett ühn! – Eck fuine datt just nich nett, datt muine Süstas un Broäas ßegget, düsse Fruinskopp hädde moe muine schlächtn Tähne inbrocht! Eck loäbe, datt eß undankboar! Oabba ßäovihl eß ßicha: Wänn eck moall Gräotvah waian ßoll, dänn will eck muine Enkelkinna nich mett dänn ßoödn Kroam teo Schanne foan! Oabba Hannchen häbbe eck doach’n lüttke Gihaltserhöhung fo dä Hiushoälge buiwilligt!