Muine loäbn Noahbas un Frünne!

In düssen Dagen dänke wui Äoln doach wall mai oasse dä jungen Lui an dä, dä uß voriutgoahn ßind! Wänn man ümme ßick teo kickt, dänn eß doach 'n männigen Platz lihg woan. Äok wia in düssen Joah! Woannoäe eß dä Ruige wall an uß ? !

Wänn dä maistn van uß noah „Köstas Kampe“ goaht, wänn wui uß noah iusa oägen Schloapstih  ümmeküiket un iusen Loäbn 'n Kranz oadda Kruiße oasse Dank un Griuß bruingt, dänn läopt dä Gidanken doach äok wuit truiggeiut. Un dänn ßoä eck, un Ji ßall datt wall äok ßäo goahn, teooäast muine Äoln vo moe stoahn!

Oba väachtig Joahs hätt ßä glücklich un teofruidn, teohäope lihbt, ßäo glücklich un teofruidn, da wui Kinna glöaffen, und vondage näo gloäbt, datt ett trotz oalla Aboät, Szoagen un Näot kaine Minsken gihben kann, dä näo glücklicha un teofruidena ßind! Oabba doa woch kain gräod't Anstelln un Malöa ümme maket, datt ßäog un vonamm man oänfach! Gräots drücket un küsset hätt ßick iuse Äoln nich, woänigstens hä wui datt nich teo ßoän krigen! Un wänn iuse Vah ßäo in'n Vobuigoahn iusa Moäm'm ßoan'n lüttken achta upp klappe, dänn lagg doa maia inne, oasse wänn ßick dä Stadtlui oän'n uppdrücket. Dä Loäfde, dütt Hailige, datt was bleoß fo dä boädn. Datt briuke kaina teo ßoän! Datt ßatt doäpe innwännig! Un doa ßatt datt äok wisse faste! Oabba wui Kinna ßoögen un fölln datt oalle mett!

Oabba oänmoall in uin'n Libn, eck was oalln gräodn Käal un hadde ßüms Freosrninske un Kinna, häbbe eck int Hachte van muin'n hachtn Vah kiken! Da felln oalle Wänne, un oalls, watt ümme ühn was, was nich maia doa, datt was, oasse iuse loäbn Moäm'm dänn leßtn Oahm halt hadde! Dä namm hoä Moäm'ms' Kopp in ßuine gräodn Hänne un flüsta wia dänn loäbn Nam'm un grain un flüsta. Un niu ston iuse stake un hachte Vah ßäo schwack un oallaine tüsken ßuin'n nigen Kinnan! Un oasse ühn dänn oäna troöstn woll un männe, Moäm'm woöa doach ßäo lange Joahs kränklick un schwäcklick wesen, dä ßeä iuse Vah: "Giwisse ßinn eck jümma stak wesen häbbe vil kwehlt un aboät't, oabba ji Moäm'rn hätt vil maia aboät't oasse eck. Szä hätt ubbn Knoäggen aboät't!" Un düsse Knoäaboät mäake wui Kinna niu näo noah maia oasse 25 Joahs.

Szücke Moäm'ms, dä ubbn Knoäggen aboät't, möchen wui iusa Jiugend van Hachtn gün'n! Datt wui oalle doateo hälpet, dänn äok Mannslui, un oalle, dä ßüß nich maia rächt könnt, könnt ubbn Knoäggen aboädn!