Muine loäbn Noahbas un Frünne!

Koal un Kläos woöan 'n pa äole Noahbas un truie Frünne. Boäde woöan, wänn üa Waigens äok wuit iudnanna stoahn heddn, mett dänn ßülbn Wada wosken! Szä heddn ßick nicks voteoschmuidn! « Dä oäne was van Sträoh, un dä 'anna was just ßäo! » - Un wail ßick dä boädn gigenßuidig ßäo geot kin'n, triu dä oäne dänn annan nich oban Wägg! Und datt ßind dänn joa dä richtigen Frünne!

Koal wuhne in ßoan'n hännigen Huiamannshiuse, haddn Goahn un Pläcken Land un konn ßick joäd't Joah 'n düht Schwuin mässen. Kläos doagigen mosse oalls oba dä Wichte haIn.

Koal hadde äok dütt Joah wia geot inschlachtet. Un upp dä voäa Zenntna in'n Räoke was hoä oannick stolde. - Teon Wöpkenbräotedn hadde hoä ßuin'n Noahba Kläos inlat. Wöppkenbräot un Schmull, datt was watt upp Kläos ßuine Mühln! Doateo gafft, wi ßick datt gihoäat, 'n batsken Machollan. Un dänn kön'n oalle boäde nich geot stoahn loadn! Un Schluck löäßt dä Tungen! - Dä oäne fäng an teo proahln, un dä anna fäng an teo groahln! Oäna obabäot dänn annan! Oasse leßtn Trump spile Koahl ßuin'n Schwuineschinken iut! Däo was Kläos iude! Un doach woll hoä nich noagibn! –„Datt woöa joa ßonnaboa, wänn eck nich äok an ßoan'n Schinken kuhm'm könne!“ – „Watt, diu? - Doa mahke eck doach joäde Wedde mett di, datt diu nich an ßoan'n geon Schinken kümms!“ - Boäde ballan ßick gigenßuidig inne Hänne. - Et güng ümme droä Oat Schluck!

Inna Wiken vo Palmßunndagg kamm Kläos un lah Koal mett ßuin'n ganzen Ingetoäme teoda Konfamatscheon in. Noa, datt konn man doach nich geot affßeggen! Un dänn oall upp Middag!

Wänn niu dä Kuckuck äok näo nich reobn hadde, oabba bui Kläos gafft frisken Schinken! Schinken in 'n Äaften un Schinken in'n Stippßel! Schinken ubbe Boddas un Schinken ubbe Brötken! Schinken räoh un Schinken koket! Schinken in joäda Iutwahl! Datt was kain Fuian un Puian buin Diske! - OaIle heon düht harin! buißoannas äok Koal!

„Noa, Koal“, roäp Kläos, oasse Koal oalln Bückßenknäop spruingen loadn hadde un ßick medda Hand datt Fett ümme dä Miuln dännewiske, „hätt di dänn niu düsse Schinken nich just ßäo geot schmicket oasse duin Schinken?“ –„Noajäa, Kläos, eck mott joa ßüms teogihbn, datt moe dä Schinken ganz vomost schmicket hätt. Oabba, ßäo oasse muine? ! - Nai, muin Schinken hätt ganz watt buißoannas an ßick! Un datt mott wall an’n Roäkan liggen!

Un niu günk dä Haikaruigge ümme dänn bästn Schinken wia läos un namm oäst 'n Änne, oasse Kläos dä Machollanpulln iudn Schappe kraig. Un Koal schmait ßick oannick inne Bost, datt hoä dä Wedde niu doach oall giwun'n hadde!

Koal hadde datt Schinkenedn ßäo munnet, datt hoä, niu äok dänn Kuckuck nich mai afftoöbn konn! Mondagoahmd staig hoä ßüms meddn Bräotmäste ubbe Roäkabühn'n, ümme dänn Schinken anteoschnuin. – Oab watt was datt  dänn?! - Koal raif ßick dä Äogen ! - Un niu mosse hoä ßick doach an'n Balken doannehäoln! Dä Schinken was wege! Szuin schöne Schinken! ! ! - Dä was stohln! - Oabba wäa konn datt dänn däon häbbn?! - Upp oänmoall fäng Koal an teo floöken und teo krajoöln. - Ühn fell datt Schinkenedn bui ßuin Noahba Kläos in! - Joa, Kläos un kain anna konn dänn Schinken stohln häbbn! - Hoä kinne ßick ßüms bäole nich maia wia, ßäo was hoä inna Brast! - Szäobutz noada Polzai! –„Haben Sie Verdacht?“ Joa, Koal hadde Vodacht!

Ubbn Girichte ßügen ßick dä boädn wia! - Kläos wickel ümme dä ganzen Gischichte äok nicks ümme. Hoä was „geständig“. Oabba hoä hadde dä Wedde giwun'n! - Datt häoge Girichte blaif bui dä „Beweisaufnahme“ äok nich jümma ßäo aianst, oasse man datt ßüß wall hoäa. Dä Richta maken Voschlag teon Vogluike. - Koal tuckschulla joa oäast 'n bidn, oabba dä Schinken was oalle, un hoä hadde ßüms düht mettspun'n! - Hoä gaff ßick dänn doach doamedde teofruidn.

Dänn „Sühnetermin“ maken dä boädn inna Wiatschaft aff. Kläos mosse vo dänn Schinken und Koal vo dä Wedde „sühnen“. - Oabba datt dicke Oä eß doach bossen! Szä goaht ßick niu ganz iudn Wege!