Muine loäbn Noahbas un Frünne!

Niu hätt dä Kinna wia Voloäf, dä Scheolmästas  Ferien, un äok dä maisten annan Lui deoht nicks maia. Man kann joa bäole upp kain'n Amte un annan „Behörde“ watt mahken, dänn oäne von dä „Sachbearbeiter“ eß just in „Urlaub“. Dä schwittket niu oalle inna Weltgischichte harümme un möt iutspan'n un ßick vohaln. - Oabba woavan dänn vohaln?! - Van dä vihln Aboät oadda van'n vihln Edn un Drinken? - Oadda eß dat Jachtan achta dän Gelle dä Grund vo oalle dä Tüddaruigge un Hampeluigge? Niu mött dä „Ferien“ oalle dä Unvonunft un oalle dä Bisaruigge wia geotmaken!

Szegget moall, wäa hätt dänn van uß früha Ferien oadda Voloäf krihgen? - Giwisse, inna Scheole gafft joa äok oall früha 'n ßoammahän Voloäf. Un wi hä wui uß äok lange vohea doaupp froögget. Oabba wänn wui dänn ßäo droä oadda voäa Wihken achta dä Szoäßen bun'n heddn un oalles in'n Hahn'njöckan ßiddn heddn, dänn woöan wui äok freoh, datt wui niu wuia Voloäf van iusa Aboät krihgen un uß inna Scheole, wia van iusen „Ferien“ ressen könn'n.

Wik woöa datt obahiupt, wänn man vondahge dänn Iutgluik tüsken Koppaboät un Knohkenaboät, tüsken unrüssen Handwäaken un ruhigen Obaleggen behda inachte noähme?! Wänn man maia affwässel un ßick bui dä oän'n Aboät van dä annan vohaln könne! Datt koäme uß doach oalle teo geot! Un watt spahn wui doabuigge näo an Aboätskräften un Geld! - Oabba Geld witt dä maistn joa nich spahn! Un doavan hä wui joa ruiklick! Datt mott unnabroacht waian! Un wännt bui uß teo Lanne nich maia rächt läosteowaian eß, dänn foöa wui int Iutland! Doa nihmtße iuse Geld jümma gaian, wänn ßä van uß ßüs äok loäba dä Hacken oasse dä Backen ßoät! Oabba eck loäbe, wui ßind doach Minsken, dä maia van'n Iutlanne un, van dä Iutlännas häolt oasse van uß  un iusen Lanne.

Datt häbbe eck doach lessens in'n Blah lesen, datt dä Lui loäba noa  Milano foöat oasse noa Mailand, wännt äok dattßülbe eß. Oabba Milano lütt doach ganz annas oasse Mailand, woa dä Minsken doach oall maia watt van hoäat hätt. Oabba wui witt doach „gebildet“ ßuin. Eck häbba äok nicks doabui, wänn wui äok teo dän Itutlännan geot un wall ßind! Oabba watt teo vihl eß, eß teovihl!

Doa ßidde eck volihdn in'n Eilzuge un foöa  Richtung Hamm. Upp irgend oän 'n gröädan Bahnhobe stuiget twoä ängelske Offzias mett üan Freosluin un'n Masse Gipäck in. Äok oasse dä Zug ßick wia in’n Gang ßet't, bluibet ßä in'n Voflua stoahn. Oasse da Schaffna düa dänn Zug kümmt, wuist hoä uppn uinge fruie Plätze hän. Oabba dä Ängelänna wänket aff un duit an,  datt ßä oalle gaian teohäopeßid’n möchen. Datt kann eck geot vostoan. Iuse Schaffna oabba mahke niu dän Veddan vanna annan Szuit mett Hand un Mund, mett duits'k un ängelsk kloah, datt ett in „Hämm“ Platz goäbe, un datße dänn üa Ecksken vo ßick  oallaine kruigen kön'n!

Kinna, moe woöa bäole dä Kragen platzet. Hannchen hoäl moe mett Giwalt truigge, ßüß hädde eck dän Schaffna noan Wege froaget! - Kann ßick oäna vostelln, dattn Änglänna oän'n Duitsken noah „Sou-tham-pton“ oadda „Glasgow“ wuiset hedde, oadda daddn Franzeose Ji „Bor-de-aux-Wuin“ vokoafft un Ji datt Schloß „Ver-sail-les“ empfohlen hedde?!  - Oabba wui könnt uß in Duitskland ruhig wächschmuidn! Un dä annan lachet oba uß!