Rund ümme dänn gräoden Spriudel

von

Heinrich Ottensmeier

 

Muine loäbn Noahbas un Frünne!

Willem von Holde hoäa mett buit Präsbiterium. Datt was just nich jümma'n lichtn Postn, dänn äok 'n „Presbyter“ kannt nich oalln Luin teo Danke maken! -Niu hadde Willem oabba 'n anginoähm'm Uppdragg krigen.  Hoä mosse fo ßuine Käakengimoäne, ubbn Szunndagg noan Szualanne foöan un in Villigst anna Ruhr inna Käaken bui ßoanna Fuia doabuigge ßuin. Upp oägen Kostn, vostoätt ßick! Willem, dä äoll ßüms ßoan'n Maschuin'nwagen hätt, lah moe teon Mettfoöan in. Niu konn eck ühn datt schlächt affßeggen, dänn eck foöa niu moall unwuis gaian meddn Auto, buißoannas, wänn man mett „Düht buidanket ßuin!“ buitahln kann. Un dänn noan Szualanne! Woanoäa waiat oän'n ßäowatt wia boan?!

Un doa niu Alfred iudn Faile mett ßuin'n „Dekawupptig“ äok dä ßülbn Richtung anstuia, konn eck muin Hannchen äok mettnihm'm. Däo was datt Glücke oäast vullstännig !

Kium was dä Melke an 'n Wege, ett was wall geot half sihbn, dao ßuckn wui oall ubbe Autobahn teo. Meddn Imde was uß datt 'n bidn knappe woan, dänn just ßunndags eß datt Bedde bui düssa Joahstuit näo ßäo mollig wahm. Oabba 'n Köppken  Kaffe kann man ßick unnawegehs gibn loadn, wänn dä Kutska ßick moall 'n bidn vopiußen mott. Un ßäovihl Tuit blaif vodda Käaken giwisse näo oba!

Oasse eck instigen was, ßäog eck, datt Willem ßuin Junge an'n Stuia ßatt. Däo wusse eck oall Buischoäd! Willem ßüm eß joa äok oall ßinniga un vonünftiga. Oabba dä Kuikens ßind vondage joa oall kloöka oasse dä Hin'n! Un ganz buißonnas buin Autojagen! - Nai, wänn eck düsse unwuisen Jagdaruige ßoä! Dä oäne kannt näo dolla oasse dä anna! Dänn ßiußt oän’n oallhand dä Hoah ubbn Koppe!

Oasse wui doa achta Bäagesken vanna Autobahn harunnafoöan, ett was wall inna nigenten Ua, däo knua moe dä Magen un dänn Freosluin äok. Datt hett, ett was oänlick watt annas! Wui heddn maia Dost oasse Hunga! Buißoannas dä Freoslui woöan ßäo schlächt teogange un ßäo mareode. Bui dänn oäastn bästn Gasthiuse foöa iuse Kutska hott anne Szuit. Huia ßoll niu oäst moall oannick froöhstücket waian. Oabba wui koäm'n mett iusen Wost- un Schinkenboddas vo dä teon Düa! Oalles Buken un Klinken hulp nicks. - Woa gifft dänn ßäowatt? Ümme dä Tuit näo in 'n Fean! - Noa, dänn ebn nich! - Ett giff joa äok näo anna Wiatschaftn!

In'n naigestn Doape droöbn wuit beda. Doa an'n Kruizwege loägen ßick gluiks twoä Kroöge gigenoba. Un bui dänn oän'n, datt Wada loäp moe oall bäole in'n Muhne teohäope, stöäan'n dä Firnstas oall spaiawuit obn.  Doa kamm walln Schmaok iut, dä giwisse just nich noa Pannkeoken räok, un dä Stoöhle hoäln dä Stahlns oalle noa bobn, oabba inna Not löätt man ßick oall watt gifalln! Bläoß dä Düa was näo teogge! Oalles Ramentn un Reobn hulp nicks! Oasse eck Anstaltn make, düat Finsta teo klaiggen, roäp moe Hannchen moe teoda Oanunge ümme dänn nuiggen Anzug! Eck loäbe oabba, Hannchen hadde Angest, datt eck doa doach „weibliche Bedienung“ fun'n hedde. Niu oabba tänga noa dänn Kreoge gigenoba! Doa woöan wui hänniga fäag! Dä Düa was äok teogge, oaba datt Klinken günk nich. Doa was nich moalln Klinkan anne ! Oapp dänn wall oall Kaffeedöstige, dä vo us doa wesen woöan, affbroken heddn?  

An  woavihl Wiatschaftn wui dä Düas proboäat hätt, woät eck niu nich maia. Ett hätt oabba glücket, datt moe dä gräodn Ruins nich dä Bückßen twoäridn hätt! -In dä Stadt Schwerte hä wui leßtn Ännes iuse Hail ubbn Bahnhobe in'n Wateßaale voßocht! Voßichtig häbbe eck doa van achta oabba oäast düa datt Kükenlett froaget. Dä Freoslui doainne woöan ßäo nett un ankuhm'm un hätt uß dänn trächtewuiset. – Niu wochet oabba äok häge Tuit! Wänn dä Käaken oall iude was, dänn hedden wui  iuse Foaht joa ümmeßüß maket - oadda ümme oän Köppken Kaffe! Niu was doa äok näo nich moalln Minske teon Buidoän'n! Däo was dä Ruige an moe! Eck kinne joa watt vanna Küken! Eck günk hänn un woll dänn Kaffe gluiks an Oat un Stih buistelln! - Oabba wi künnt ßick ßäo Freosluie doach in ßoan'n Äogenblick voännan! Mett Glanz un Gloria, hättße moe hariutschmidn! Bäole hedde eck doach van dänn oän'n Wuibesstücke, datt an'n Uppwisken was, oän'n meddn Uppnihma krigen! - Ett was man'n Glücke, datt niu just dä Oba kamm, wäa woät, wick datt ßüß näo iutläobn woöa! Iuse Köppken Kaffe hä wui doach näo krigen, un inne Käaken koäm'm wui äok näo just oast Luin vobui was!

Oabba wäa ubbn Sunndagmoahn meddn Auto läos mott, dä ßall doach 'n Pulln mett Kaffe mettnihm'm.

                                                                                      Jiu Otto van'n Stickdoäan

 
 

pdf-datei