Dä äole Wittkopp blaif stäohn!

von

Heinrich Ottensmeier

 

 

Loäbe Noahbas un Frünne!

„ Datt Oalla kümmt mett dä Joahs!“ Dä Tuit nimmt uß oalle ßinnig bui dä Hand! – Doa drehbe eck vilihdn Frettken iut Äcksta. Wui ßind Broöakinna. – „Noa Frettken, wi goät’t dänn näo ßäo?“ – „Oach eck well nich klagen. Ätt goäht joa näo ßäo fluidig wäch!“ -  „Jäa, Fretz“, ßeä eck, „wui waiat äok jümma ölla“. -  „Oach“, männe Fretz, „datt woöä nich ßäo laige, bleoß dä Lui kinnt oän’n oall teo lange!“ – Szui, datt esst joa just! Eck hadde moe äok inbillt, eck woöä näo’n jungen Käal. Eck was datt jümma näo ßäo giwuhnt, datt eck inna Uisenbahn un in’n Omnibus, wännt düht vull was, dänn Freosluin muin’n Sziddeplaß anbäot. Eck moäne, datt woöan wui iusen Freosluin äok näo in dä Tuit dä Gluikberechtigung schüllich. Wui witt doach jümma näo datt Mäst bobn in’n Koabe liggen häbben! Un „Mannshand bliff bobn!“ hett doach ’n äolt Sprichwoat. Dänn mott man äok ’n bihden vo dä Freoslui heapacken.

Oabba do eß moe doach vochtn Szomma watt annas obakuhm’m. – Eck foöa mett dänn EMR-Onnebus noa Häawedde. Kium was eck instihgen un hadde muin Billjett buitahlt, doa stoand doa doach ’n junget Doäa van’n Lui upp, ätt konn äok wall buifruigget ßuin, un bäot moe  ßuin’n Plaß an. Moe staich oannick ’n Läoge teo Koppe. Oabba oäa eck ’n Woat stüdan konn, hadde moe datt Luid mett ßoeden Gnoisen un woäken Druck upp ßuin’n Sziddeplaß drücket. Jäa, watt ßegge Ji doa van? – Was datt niu „im Wege der Gleichberechtigung“ oadda hadde eck doach mett muin’n fain’n Koppe ßoan’n  geon Indruck bui dänn Lui mahket?

Schah, dat’t oall hännich iutstaich, ßüß hädde eck moe doach ümme dänn Grund ’n bihdn naiga buikümman konnt. – Oadda eß iuse Jiugend doach nich ßäo laige, oasse datt jümma ßächt un schrihben waiat? – Giwisse, eck häbbe datt äok oall fahken ßoähn, datt junge Bängels un äok oallhand Luidens mett oalla Giwalt teooäast instuigen witt, doamedde ßoä vo dä äoln Freoslui teon Szidden kuhmt, un noa Möglichkoät an’n Finsta. Oabba ett giff äok annare.

  

Vo kochta Tuit satt eck achta in dän Busse noahn Szoaltwäake (Bad Oeynhausen). Upp oäna Statschäon stuiget doa oallahand Lui in. Maist oalle ölla Lui ’n uinge Freoslui mössen stoahn. Äok ’n Mann meddn Kopp vull widde Hoa. Dä kaik oäast ßoan pa junge Bängel stua an, oap dä wall nich fo dä Freoslui, dä üa Gräotmoöm’ms ßuin kön’n, uppstoahn wolln. Oabba nai! Däo froage hoä dä boäden jungen Käals ganz fruindlich, oapp ßoä wall fo dä äoln Hommas uppstäohn kön’n. Un ßoä könnt! Szä grummeln näon bihdn vo ßick hän, wail ßoä ßick doach niu düt schäm’m, oabba dänn Fresluin was hulben! Eck moäne, ett briuket iusa Jiugend bläos ßächt waian, wi düsse äole Minske datt mahke! – Hoä ßüms oabba danke fo joädn Sziddeplaß un blaif stäohn!

Jiu Hinnack van’n Brinke

 

 

 

 

 
 

pdf-datei