Oelge int Fuia oadda upt Wahda?

von

Heinrich Ottensmeier

 

Muine loäbn Noahbas un Frünne!

Wänn oalle van Ölge un Benzin vull ßind, wänn oalle Lui bleoß näo van « Ölgekriug » küat, dänn kann eck doach wall äok nich maia schwuig'n!

Joa, oasse Kinna, ßäo vo bäole ßibzig Joahs, dä heddn wuit äok mett Ölge teo däon! -Eck moäne nich mett Roöfölge, mett dän iuse Moäm’m jümma ßoan'n läckan, knuppagen Pannkeoken backe, oadda in dän wui bui Fellkatuffel, fillte Katuffel stibbn! Oach joa, muin Hannchen hätt düsse geon Meode bätt vondage wuida buihäoln. Oabba niu kann man joa bäole kain’n Roöfölge maia kruigen. Dä Lui ßind joa oalle ßäo läckask woan, iuse Gräotvah wöache «dickefrehdn» ßegen; ett mott. „Salatöl“ ßuin. Dä kümmt iudn Iutlanne, un dänn esse ßicha behda oasse iuse Roöfölge!

Nai, eck moäne niu äok „Erdöl“! - Kinna, Kinna, watt ßin wui doa medde teo Moade kuhm'm! - Oall oasse Kinna heddn wui ett mett «Erdöl » teo deon! Wui ßeän däomoals «Stoänölge», dä vonihm'n Lui « Petroleum ». Joäde Wihken mössen wui medda Stoänölgekan'n läos un'n pa Liter haln, datt iuse voäa Luchte un Lüchtns brän'n kön'n. Iuse Hoppa männe, früha heddn dä Lui buida Troanlucht äok ßoän konnt, un dä Troan hedde nich ßäo wuit halt waian moßt !

Oabba wat hä wui Kinna uß froögget, oasse wui datt « Elektrische » krihgen! Un datt Lecht was vihl hella un ßäo buickwaime! - Joa, buitkwaime!

Muin äole Noahba Otto van'n Stickdoäan, dä eß just ßäo oasse dä maistn Lui vondage! Hoä eß äok fo datt Buikwaime! Noan Gelle waiat joa nich maia kihken! Datt essa joa gineog, un an Spahn dänkt kaina maia! - Oadda laiat ßä uß datt Spahn niu wia bui Ölge un Benzin? !

Kuikt! Muin loäbe Otto mosse niu äok mett oalla Giwalt ßoanne nuigge „Olheizung“ häbbn! Dä Ohbn roäke nich maia! Un datt woöan ßoanne Ümmestänne mett dä Köhle! (Niu upp oänmoall! Un woa lange hadde datt geot goahn!) - Eck loäbe, datt ßuin „Innafoa“, ßuin Freosminske, doa äok 'n Lihpel teo wosken hadde! Dänn woch datt Köhleschlüan upp dä äoln Dahge äot teovihl! Oabba eck moäne, Otto hedde bui ßuina vihlen Lihgläoparuigge wall dä pah Ämma full Köhle hahln konnt! Oabba wäa datt Läobn meddn lihgen Schwängel oäast düagoahn eß, dä eß teo nicks maia teo briuken. Un niu mott datt Hold ßäo ubbn Hobe oadda in'n Buske vokuhm'm!

Oasse Otto ßuin'n Kroam fäag hadde, draif moe dä Nuischiagkoät doach noan Stickdoäan. Un eck mott ßeggen, ßäowatt kann oän'n doach lüssen! Inna Küken un ubba Stobn, joa, ßäoga in oalle Kahmans kön'n ßä niu boödn! Un datt doän ßä äok! - Junge, niu günk moe äok 'n Lecht up! Otto konn jümma, buißoanners 'n Winda hän, ßäo schlächt noan Bedde kuhm'n! Niu briukt hoä kaine Wäamekriuken un kain 'n hoädn Backstoän maia! - Un ßäo buikwaime eß datt! Bleoß an ßoan'n lüttken Räddken draiggen, un in'n ganzen Hiuse hättße Fuia anbott! - Oapp ßäowatt oalle ubbe Dua geotgoahn kann?!

Un ett hätt lange geot goahn! - Oabba iuse Häagott stoöat dä Bäome, dattße nich inne Hehbn wasset! - Upp oänmoall woch niu dä Ölge duia un knappe! - Noa, Ji könnt joa oalle doavan noaßeggen! - Mett dän „Spritt“, datt well eck näo nich ßäo achtn! Datt hätt joa äok ßuin Geos! Man kann niu Szunndages wia twas oba dä Stroade kuhm'm! Wänn datt bui dän Szunndagen bliff, dänn laiat dä jungen Lui äok moall iuse schön'n Szuike un Brinke, iuse Büske un Braken, kin'n! Un doabuigge mäaket ßä äok, watt datt ßäo bui Schnoä un Szun'nschuin vonne roäggen Luft giff, äok bui uß! - Un oalle Lui ßegget mett lachen Munne Dagestuit! Un Lachen eß gißund! Un ßäo eß datt dubbelt un droäfach gißund! Äok fo Jiun Hinnack!

Otto tradde düht uppt häoge Boän! Hoä hadde in'n Moä oalls vulltanket! Un dä 6000 Liter ßolln bätt teon Froöhjoah roäken! Un dän däomoals näo fo 17 Pänge! -Joa, bui ühn was oalls inna Ruige! Bätt -joa bätt!

Ett wassen Szunndage vo acht Dagen. Otto woll tuitlicks inne Fean kriubn! Oabba, watt was datt! Datt ganze Hius stank noa Ölge! - Un oasse hoä in'n Kella kamm, däo ßäog hoä, datt unna dä oän'n Tun'n oa1l 'n Päohl Öllge stoand! Un ett loäp 'n richtige Bihke hariut! Däo was Holland in Näot.! - Eck weIl Ji niu nich oalls vostückan! Oabba Hinnack eß niu lütk woan! Hoä hätt niu bleoß näo twoä Tun'n vull, dä oäne eß nich maia teo briuken! Watt was datt’n Uppregung mett Iutpumpn un Inpumpn! Voäa Mann buawäakn dän ganzen Mondagmoan in ßuin Ölgekella harümme! - Un oapt niu näo roäket düa dän ganzen Winda? !!

Oäne gräode Rekenung eß oall kuhm'n! Un dä annan ßött wall äok nich lange upp ßick toöbn loadn! - Un just up Wuihnachen! - Oabba eck wäll kain’n Ölge int Fuia goädn! Loäba Ölge uppt Wahda! Datt ßall jo hälbn! - Oabba Spotthius kann brän’n!

                                                                                       Jiu Hinnack van'n Brinke

 
 

pdf-datei