Muine loäbn Noahbas un Frünne!

Wäa hätt van Ji dänn nich äok oall Last mett Wochels (Warzen) hatt? - Dä Wochels ßit't oän'n nich bleoß düht in'n Wege, ßä könnt äok hadde woähdäon un unwuis bloön. Un dänn ßüt't faken nich schön iut! Oallhand kann mann ßä nich wia kwuitwaian, un oallhand ßindße oalle wia wege !

Eck hadde vo Jaohs äok moalln uinge ubba Hand ßiddn. Däo häbbe eck moe iudn Hagen Schimboat (Schöllkraut) ßocht un häbbe dä Wochels mett dän gehln Szappt inribn. Un dä Wochels ßind wäggoahn! - Schimboat eß joa obahiupt nich teo voschmuidn! - Wänn man Schimboatwochel in'n Pulln vull Machollan dött un gräfftn dänn uinge Dahge inne Aian, eß daddn Middel gigen Kriwet (Krebs). Eck woätt niu oabba nich ganz ßicha, oapp muine Wochel van dän Schimboat wäggoahn ßind, oadda oapp ßä ßüß äok ßäo weggoahn woöan.

Oasse Kuind häbbe eck moall hoäat, dä Wochel mösse man'n Däon mett in Graff gibn. Un oasse niu just 'n Luik bui us heakamm, ßeä eck: „Nimm meo dütt aff. mett in duin Graff!“ Doabuigge telle eck dä Wochel aff, dä eck an'n Hän'n hadde. Oabba oapp datt däomoals hulbn hätt, datt woät eck nich maia. Oabba datt ßallt wall, ßüß mösse eck dä Wochel joa vondage näo häbbn! Datt bäste oabba eß, datt man doaoba mett äoln Luin küat, dä dovan watt vostoaht! Un datt häbbe eck däon.  

Häam vanna Egge ßuin Vah, dä hadde datt ßüms iutproboäat! Dä mosset doach niu widn! Hoä hadde äok dä Hänne moall ganz vulla Wochel hatt. Oasse niu wian Luik was, passe hoä ginäo upp, woanoäa datt datt Luik int Graf lutt un inßeget woch. Just düssen Äognblick hadde hoä wah noahm un ßuine Hänne inna Bike affspollt. Oapp hoä datt niu nich richtig maket hadde, joädnfalls hadde dütt Affspoöln nicks hulbn!

Szüß, floädn Wada ßall joa düht geot ßuin gigen oallehand Szuiken un Krankhoätn. Buißoannas gigen Äogenkrankhoät! Man mott bleoß widn, oapp man meddn Wada oadda gigen datt Wada nimmt! Datt essen gräodn Unnaschoäd un bui joäda Szuike annas! - Un woarümme ßall datt dänn nich hälbn? - In Pamund (Pyrmont), doa maket dä Lui datt doach äok! Dä hätt doa doach oannick ßoanne Äogenwelln oadda Äogenbrun'n. Un datt Wada kümmt doach iut dä ßülbn Aian!  

Oabba Eggehäams Vah hätt dänn doach fo ßuine Wochel näo datt richtige Middel fun'n. Hoä nam'n Twaiansfamt un make doa just ßäovihl Knüppe oadda Knoäpe in, wi hoä Wochel hadde. Un düssen Twaiansfamt mett dä Knüppe mosse hoä truiggeäst wäggbruingen un dänn oban Kopp unnan Drübbnfall schmuidn. Un datt hätt hulbn! Just oasse dä Twaiansfamt vofiult un vomoaddat was, däo woäan dänn äoln Eggemoäa ßuine Wochel äok wege!

Kinna, Kinna, watt man  doach nich oalle widn mott. Eck loäbe datt wiht’t iuse Doktas nich moall oalle! - Gewisse hätt datt vondage oalles ßuine Näot, dänn wäa hätt dänn näon oannicken Drübbnfall? ! Oabba villichte könne man doa näon Zweckmühln anleggen! Eck moäne, doa woäa ammänne näon Gischäfte teo maken, dänn eck woät näo maia ßücke Middels! Un dänn ßind oalle iutproboäat, hätt Eggebrinks Häam ßäggt!