Muine loäbn Noahbas un Frünne!

Eck hadde Ji teoßäggt, datt eck Ji vardahge Otto van'n Brinke ßuine Hoachtuitsgischichte wuidavotelln woll. - Moe hadde dä Nuiloaht niu doach äok ßäo packet, datt eck'n Glas Boäa iutgaff, dänn bui iusen lüttken Schluck heddn wui oalln geo halbe Stunne ßehdn. - Un niu votelle Otto wuida: « Noa dän vihln Volett ßiuse dä Junge niu mett us in ßuin'n Auto aff noa Builefeld. Doanne bui dä oäastn Käaken woch dä Wagen uilig ubbe Halbe stellt. - Joa, wui woäan äok oalle 'n bihdn inna Buingen. - Dä Junge hadde upp ßuina Szuit dä Düa oall affschlohdn. Mett moe duat datt joa oall 'n bihdn länga. Eck mosse näo upp muina Szuit dä Düaklinken häochmahken. Dänn woöa äok huia « Schmihs Kättken » doafogge. Just woll eck dä Düa achta teoschmuidn, däo ßeä dä Junge: « Hoalt, eck will muin'n Obatoäa iuttoän un in Wagen schmuidn, dänn häbbe eck doa kaine Ummestänne medde! » - Gißäch  - gedäon!

Inna Käaken was datt oalle ßäo nett un ßäo ankuhm’m, datt eck oalln Volett un Vodroät ganz wia vogihdn hadde. Oasse eck muine nuiggen Doachta in'n Backfel noahm'm hadde un muin'n Jungen dä Hand drücke, fell moe upp, datt dä Junge ßäo unrüsse was. Eck klobbn 'n bihden ubbe Schullan un flüstan int Oa : « Junge, niu nimm di doa man nich maia medde upp. Niu eß joa oalles inna Fissen! Kumm, loatt uß niu man 'n Stündken krihgel un freoh teohäope fuian, dänn kresse wia fresken Lussen. Eck froegge moe äok düht! » -

« Oach, Vah », stüda dä junge Bruigen däo, « datt woöa joa äok oalle geot un nett, oabba eck kann man nich wia in muin'n Auto kuhm'm! Muin Wagenschlüdel ßitt in muin'n Obatoäa, dänn eck teoleßt näo in'n Wagen schmihdn häbbe! »

Düttmoall wusse eck äok kain'n Roat un Iutwägg. Aeok kain'a iut dä lüttken Hoachtuits-Szellskopp, dä wall droä oadda voäamoall ümme dänn Wagen togeon eß! Eck woll oall dä Riudn inschloahn, oabba dä annan hoäln moe oalle truigge. Giwisse, datt tütt joa äok nich schlächt! Un dänn, bui dän käoln Wea un dän dün'n Tuige! Leßten Ännes woch ßoan'n Autofoawäaka anreobn, dä uß in 'n vonihmet Hotel broache, woa datt Midachedn vo uß buistellt was. Un dä Junge mosse niu oäast met ßoana Mihtskutsken noa Hius foöan un dänn twoädn Schlüdel fo ßuin'n Wagen haln. Datt wassen Glücke, dat't düssen Iutwägg näo gaff!

Datt Festehdn mosse niu mett dä oän'n Hälfte van dä nuiggen Ehe gihdn waian. Joa, datt hätt uß just oalle nich passet, Hannchen, Matille un moe! Van dä jungen Frübbn will eck nicks ßeggen. Dä hätt ßick üan oäastn ehelichen Kumma düht vobihdn. Ett passe äok jümma upp, datt muin Wuinglas nich druige stoand. Un eck ßoage doafo, dat't jümma wia lihg woch, bätt moe Hannchen unnan Diske ubbn Feot tradde! Döo wusse eck Buischoäd !

Oasse dä Junge niu mett ßuin'n oägen Wagen ankamm, kraig hoä joa äok näo watt teo ehdn, oabba laid hädde moe doach däon. Un bui ühn konn man dä Hoachtuidsfroöde äok just nich säo van'n Gißichte afflesen.

Tüskenin günk eck dänn moall vanna Stohbn un küa mett dänn Oba. dä dä ganzen Ehdaruigge un Drinkaruigge uppdisket hadde. Dä mahke 'n ganz doäbn Dihna oasse eck ßeä: „Herr Oberkellner, die Rechnung bekomme ich!“ - Jäa, woateo was eck dänn oänlick ßäo dä Vah van'n Ganzen! Un eck konn ruhig 'n bihdn uppt häoge Boän trähn, dänn eck hadde teo oalla Voßicht 'n Hunnatmahkschuin inne Tasken stehken. Un woarümme ßoll eck nich äokk moall’n Knäop spruingen loadn, dänn wui könnta joa oalle nicks van mettnihm'm!

Oasse moe dä Oba wia medda doäbn Voboägung dä Rekenung an'n Disk broache, stacke ßick dä Junge doatwisken. Hoä namm moe datt Papuia iuda Hand. Un eck loät äok ßäobutz aff, oasse eck ßäog, watt doaunna ubbe stoand! Deosennäomoall ! Nai, ßoann Geld von Middagehdn! Szävihl hadde eck ga nich inna Tasken! Doa hedde eck moe bäole schön inne Nihdel ßet't hatt!

Un niu konn iuse Junge upp oänmoall wia helleiut lachen! Düttmoall oaba oba muin dummet Gißichte! Hoä wusse joa iut oägena Erfahrung, wi ßuin Vah meddn Gelle ümmegoäht. Eck häbbe nicks maia ßäggt. Un niu ßinn wui dänn doach nao oalle mett Spoaß un lachen Munne noa Hius foöat! - Nai, Hinnack, in düsse nuiggen Meodn kann iusaoäna ßick doach nich maia trächtefuin'n!

Un datt goät moe äok ßäo!