Muine loäbn Noahbas un Frünne!

Doa eß doach düsse Dahge wia ßoann « gräodn äoln Mannsminsken »  ümmet Lihbn kuhm'm. Hoä hätt ßick medda Flintn däotschohdn. Mett Willn oadda iut Voßoähn, datt stoät doahänn. Dä Minske ßall oallehand Boöka teon lesen schrihbn häbbn un Ruimßel un Votellßel. Oapp doa watt anne eß, kann eck nich ßeggen, dänn eck häbbe nicks doavann lesen. Opp dä Lui, dä ühn ßäo proahlt hätt, datt ßüms lesen hätt, woät eck oabba äok nich.

Kocht un geot, eck häbbe moe datt an'n Radio anlustat bui dä Noahrichtn. Un däo woch äok rommt, datt düsse Minske ßäo „trinkfest“ wesen woäa. Eck woät nich rächt, oapp niu just datt Drinken teo ßuin'n gröätsten Vodoänstn hoäat hätt, oabba eck nihme an, datt dä ßuine „Trinkfestigkeit“ just nich mett Szäot- oadda Wellnwahda unna Buiwuis stellt hätt! Un in dä annan Drinkaruigge eß doch ßäovihl, watt äok dänn „Trinkfesten“ van'n Boän'n un van'n Vostanne bruingen kann. Doa mössen Ji moall muin Hannchen hoäan, watt datt van ßoanna Drinkaruigge hoält!

Ett kann oä’n oabba doach äok oallhand düht moöggen, wänn man ßütt, watt dä äole Fusel von Mallöa anrichtet. Un dänn ßind ett doch just fahken dä geotmoedigsten un gifälligsten Minsken, dä buin Schluck nich „nai“ ßeggen könnt, buißoannas, wänn dütt boäse Wahda äok näo datt leßte bihdn oägen Willn lamm lächt hätt!

Un wänn mann dänn läst oadda hoäat, watt dä „Alkohol“ unna dänn Autokutskas, Töfftöffjagas, Mopedknallas un äok unna dä Feotpattkas in'n „öffentlichen Verkehr“ anrichtet, dänn ßoll man kain'n maia anpacken, äok nich, wänn man doamedde gihgen Vokuihlung oadda Grippe angoahn wäll! - Wännt man ßäo woöa! Äok äole Lui wiht oallhand üa Moade nich!

Vedda Paida was äok 'n vomohstn Minsken. Hoä konn nöämt watt affßeggen. Buißoannas nich, wänn oäna oän'n fo ühn iutgihbn woll! Un bui oän 'n blaifet dänn äok nich. Wänn hoä oabba oäast ubbn Gischmack kuhm'm was, dänn kamm hoä nich bleoß schroat noa Hius, nai, dänn was hoä fahken doanne oassen Mihk. Datt laigeste oabba was, datt dänn Vedda Paida datt Reohe biudenkaia. Dänn hadde ßuin Ingetoäme nicks teo lachen!

Szäo broache äok huia dä äole Fusel Äaga un Vodroät inne Famuilgen. Dä Lussen teon Aboädn was wege. Datt Freosminske mett dänn Kinnan mosset Land voregoäan. Oalles Günseln un Behdeln hulp nicks! Paida ßuin Dost woch jümma groädda. Un in’n Hiuse dä Kumma äok!

Watt hulpet, datt dänn äoln Paida dä „Finanzen“ spaiat wöachen! Hoä schlüa äok ohne Geld noahn Kreoge. Un doa ßatt hoä dänn un huige un lua, bäddn „geon Fruind“ harinkamm un fo dänn „ahm'm äoln Minsken“ 'n lüttken Schluck oadda äok maia iutgaff. Un ßoannaboa, dat't dänn ßaovihI „geo Frünne“ giff! Un ßäo kraich Vedda Paida jümma näo wia ßatt!

Oasse dä wüaklich geon Frünne oalles Mögliche voßocht heddn, Vedda van ßuin'n boäsen Dost vanaff teo bruingen, oabba nicks maia reddn kön'n, doa voßoche äok dä Buistoa, ßuin'n Paida wia ubbn rächtn Patt teo bruigen. Niu dreop hoä ühn oasse hoä just wia iudn Kreoge kamm un in Schlangenoat datt Spoa noa Hius ßoche. –„Aber, Herr Peter, sie sollten doch nicht immer diesen bösen Schnaps trinken!“ –„Och, nai, Häa Buistoa, doa hätt ßä äok ganz rächt. Jümma düssen batsken Schluck datt eß äok nicks. Doarümme drinke eck äok gaian un fahken 'n Glas Boäa doatüsken!“

Äok dütt Inne-Loädn-Tucken hätt nich hulbn! Vedda eß oäast upp ßuin'n leßtn Laga van'n Schluck vanaffkuhm'm!