Moe bihbt datt Hasenfell!

von

Heinrich Ottensmeier

 

Muine loäbn Noahbas un Frünne!

Moe bihbt niu oall datt Hasenfell, wänn ecka bleoß an dänke! Eck ßall niu äok näo ubbe Preobe stellt waian, oapp eck äok oannick foöan kann! Doabuigge häbbe eck oall oban half  Joahunnat  „Fahrerpraxis“. Eck mösse oänlick datt „Eichenlaub mit Schwertern un Brillanten“ fo „unfallfreies Fahren“ häbbn, dänn datt oäne Foöa Mäß, datt eck moll ümmeschmihdn häbbe, tellt doach wall nich mett. Doa eß nömt buigge teo Schadn kuhm'm, un datt hätt iuda muin'n Vah un moe äok kaina ßoän. Un dänn ßind datt niu äok oall wuit oaba fifftig Joahs hän! Un doabuigge foöat moall mett Loädn un Schwihbn! - Oabba datt waiat vondahge oalle nich mettellt!

Eck ßall niu upp muine äoln Dahge näo 'n „Führerschein“ mahken fo muin Moped. Un doa foöa eck äok oall ßäo lange medde, datt eck huia äok bäole’n Oahdn vodoänt hedde! Eck ßinn ümma düht voßichtig wesen. Un wänn upp ßoan'n Kruizwege dä Autos oalle pöätn, dänn ßinn eck ebn affstihgen un häbbe muin Rad ubbe annan Halbe schobn! Oallhand wuisen dä Autokutskas noahn Koppe, oabba datt eß moe gluik. - Wänn eck dänn oabba wia ßoäh, wi düsse Halflangen un Droäväallangen mett dä Dinga dä Lui vorückt mahket, dänn ßall datt mett dänn „Ubbe-Preobe-stelln“ wall nich teo ümmegoahn ßuin! Oabba dä Bücksen bihbet moe doach!

Giwisse, Häam iudn Wuindfaile, dä joa jümmahän näon Joa ölla eß oasse eck, dä hät't äok näo proat broacht! Oabba dä häddn oägen Kopp un Iutdua! - Häam hadde ßick upp ßuine äoln Dahge naon Auto koafft, ümme ßuine Hoähna un Oäa nich maia meddn Ahmkoabe oadda meddn Flitzepeh inne Stadt teo kwehln. Oasse hä dänn Maschuin'nwagen ubba Dehl stoahn hadde, günk hoä noa ßoan'n Autoscheollaia inna Stadt. Dä kaik Häam oäast ßoann bihdn vanna Halbe an un froage noah Oalla un Handwäak. Häam kraich ßuin'n Geldbuil iuda Tasken un buitahle dä ganzen Laiatuit in voriut, un däo wa's oals inna Fissen! Häam woll niu achtat Stoöa, ümme gluiks läosteokutskan. - Hoä hadde joa ubba Dehl oall übet. Szuine Ämma hadde ühn jümma vana Iutlucht bätt noa dä Nihndüa schohbn un dänn wia truigge. - Oabba ßäo uilig was dä Autoscheolmästa wia nich! Häam mosse wihkenlang laian, just oasse vo fifftig Joah ubba Scheolbank.

Dä Prüfungstamuin kamm. Wuindfailds Häam mosse huia hänfoöan un doa hänfoöan. Ett hulp ßick teoda Näot! Bleß in dänn knabbn Draige was dä Stroadn teo schmall, un Häam mosse uppt Treddeahr! Dä Schuld lach anna Stroahde oadda an dä, dä ßä biut hätt. Oabba Häam mosse unschüllig luin un blaif inna Autoscheole ßiddn! - Datt naichste Moall loät dä Proeba Häam iut liuda Schinkane wia ßiddn! –„Schnell noch rüber!“ Roäp dä Käal, oasse datt räo Lecht buin Kuapahk in Önnhiusen upplüchte. Un Häam foöa dänn Buifehl iut! Was datt dänn kaine Schlächtigkoät? ! - Eck hedet teogihbn! Oabba Häam hät't buin drüddn Moall hänkrihgen! - Oapp eck datt äok wall mett droä Moall hänkrihgen hädde?

                                                        Jiu Otto van’n Stickdoäan

 
 

pdf-datei