Muine loäbn Noahbas un Frünne!

Ett buimött oän'n joa ßäo oallahand in’n Lihbn ! Man ßall ßick äok oallawegen trächtefuin'n un mett oalln buiküan. Oabba laige waiat doach jümma, wänn mann moall inne Hiushoälge affkommandiat waiat!  Joa, buin Militea was datt watt annas! Doa was datt ßoan Posten teon Vohaln! Oabba unna oägena Voantwoatungen !

Muine loäbn Noahbas un Frünne!

Oall mett dä Bracken un meddn Kohken hätt datt ßuine Muddn! Joa, ßäolange mann dä Odda näo vanna Kahman haln kann, wänn datt Freosminske moall nich rächt teo Gange eß, jäa, ßäolange goätt datt watt doa ßüß näo oalle anne bummelt un bammelt! Dänn eß oän'n dat Fuia iutgoahn un kann noa Holt un Köhle läobn! Hässa wia'n  oannicke Leoge unnalächt, dänn kohkt dä Mälke oba oadda ett rückt ßäo ßoannaboah inna Kühken. Dänn eß gewisse dä Kaffeekihdel druige oadda dä Schillegastn ßind anbrännt! Oabba datt laigeste eß doach jümma näo dä vihln Uppwaskaruigge! Just hässe dänn Kroam roäggen un wost wia int Schapp stelln, dänn mot't oall wia ubbn Disk. Dänn waiat't wia scheddach mahket, un dä Aboät goät van voane läoß. Dänn ganzen Dach hätt man aboät’t un hätt soams nicks uppteowuisen. Nai, eck well doach loäba dänn ganzen Dach biudn schäowäaken un Hannchen dä Aboät in'n Hiuse un vo oalln Dingen inna Kühken obaloadn. Un datt Gnühdan well eck äok teogihbn un well äok aff un dann moall ßeggen, datt Edn geot schmicket un oalles ßäo proppa un ßäo nett bui uß eß !

Oabba ßäo wi Wiskhius Stoffel, nai, ßäo hätt moe datt dänn doach näo nich goahn! Hoä hätt moe düsse Dahge ßuin Laid klaget. Oabba eck loäbe doach, datt hoät doach'n bihdn obadrifft, wänn hoä moe äok ßächt hätt, ett woöa wisse woah! Un wänn hoä moe niu  dä Hucken vullogen hätt, dänn loäge eck ühn datt niu noah!

Wiskhius Jättken, watt Stoffel ßuin Freosminske eß, woll äok moal'n pa Dahge voroäsen. Datt Mehken, datt ßä in'n Wiskhiuse vo langen Joas hatt heddn, was in'n Bäagesken buifruigget. Niu kamm datt öllste Luid, bui dänn Jättken Vadda stoahn hadde, iude Scheole.  Jättken was teo Konfamatscheon inlaht, un wail niu datt Geld fo dä Uisenbahn oänmoall doa inneßatt, woll ett äok'n pa Dahge Voloäf nihm'm. Noa, Stoffel woll niu ßuin'n Hiusengel datt äok nich ruttsken affßeggen, oabba vo't Katuffelschroadeln hadde hoä doach bannigen Manscheddn! Oach, hadde Jättken männt, doa briuke hoä ßick kaine Koppuine ümme mahken, dänn ett goäbe vondahge ßäo vihl teo kohken ohne Katuffel. Datt hännichste woöa, wänn hoä dä langen Niudel, Makkaroni, kohke. Un dä Kinna möchen dä äok ßäo gaian. Wänn hoä doa 'n bihdn schmoltn Boddan obadoä, dänn woöa datt 'n hännich un geot Middach.

„Junge, Otto“, ßeä Stoffel teo moe, ett eß doach geot, datt iuse Freoslui nich ßäo fahken an'n Harümmedängeln ßind oasse dä Stadtfreoslui. Jättken hadde uß vo dänn oäastn Dach näon oannicken Pottvull, „bluind Häon“ kohket. Doa heddn wui äok teon Nachmisse näo ßatt anne. – Oabba dänn twoädn Dach günk fo moe datt Hanskenmahken läos! Un dänn wast äok just Szunndach ! Noa, dänn haran an dä langen Niudel! Eck kraich iusen gräodn Middachspott uppt Fuia. Noa, Jättken hadde doach woänigstens voßoaget. Fuif oadda ßesse van dä Niudelkastens loägen in'n Schappe. Dä Pott woch joa just nich ganz vull, oabba datt mosse ßick niu moal buihälbn! Wännt nich roäke, dänn mössen dä Duddn näon Bodda edn. - Oasse dä Pott teon Kohken kamm, duat nich lange, dä büan dä Niudel dä Stülbn upp un kihken bobn iudn Podde. Nai, watt was datt? Oalles Drücken un Knehn hadde kain'n Zweck. Ett woch jümmd näo maia. Eck kraichet medda Angest! Noa, Otto, eck wellt kocht mah'ken! Wui hätt schmiddachs Niudel gihdn. Wui hätt des Oahms Niudel gihdn! Wui hätt dänn twoäden Middach Niudel gihden. Datt hett, däo günket oall'n bihdn laipe teo. Teon Nachmisse gafft Niudel! Oabba dä Trabantn muiln oba dä Kribbn! Eck ßatt niu oalaine bui dä Niudel!

Oasse Jättken inkamm, schläoch ett dä Hänne oban Koppe teohäope! –„Jäa, muin loäbe Jättken, düsse Wihken häß diut moall geot. Middach briuks diu nich kohken. Wui hätt näo Niudel gineog. Niu gafft Niudel un wia Niudel! Joa, ßäolange Niudel bätt datt eck medda Kniuffiust ubbn Disk schläoch un in'n „Hungerstreik“ tradde. -Niu eßt vobui mett dänn Tuiges! Eck loäbe, van dä lestn strickt moe Jättken näon Ünnawams! - Eck ßin muin Lihbedahge van Niudel kuriat!“ - Oapp Stoffel nich doach wall obadrihbn hätt?