Loähne stellt Önnhiusen in’n Schadden!

von

Heinrich Ottensmeier

 

Muine loäbn Noahbas un Frünne!

Eck wanke joa niu äok fahken in Önnhiusen. (Wui hia teo Lanne ßegget joa jümma näo „Ubbn Szoaltwäake“.) Eck lese äok fluidig in'n „Anzeiger und Tageblatt“, un äok dänn „Jordansprudel“ studia eck joäde Wihken. Eck mott ßeggen, datt doa doach ßäo oallehand mahket waiat, ümme iuse Kuagäste inteolahn und ett üa anginoähme un buikwaime teo mahken. Doa stoaht oall ubbn Bahnhobe teoda Buigruißung oadda teon Wilkuhm'n schöne Bläom'm proat. Eck loäbe, twoä oadda ßäoga voäa gräode Pödde! Datt mott doach wall dä Bundesbahn ßüms däon, datt ßä ßäo dä Bläom'm fo iuse Bad küan löät! Eck ßoä, dä Bundesbahn goät doach äok medde Tuit.

Oabba ßä mahket doach Unnaschoäde! Datt anna Bahnhöbe votohgen waiat, datt paßt moe nich!  Datt könn wui doach oalle nich häbbn! Oabba watt doa in iusa  Noahbaskopp, in Loähne, mahket eß, datt ßoll oalle, dä vo „Stadt und Bad“ ßind upplustan loadn! Doa moddn Scheoh ümme antohgen  waian !

Eck häbbet moe vogoahn Wihken  bui dänn schön'n Wea äok lüssen loadn un häbbe moe ubbn Zug ßet't un ßinn äok düa dä Gihgend göckelt. Un in Loähne mosse eck ümmestuigen. Datt hätt man joa oal hoäat, datt düsse Bahnhoaff inna Hiuptßake teon Ümmestuigen doa eß. Oabba eck hadde niu oallehand Volett un kaik moe äok 'n bihdn  ümme. Oabba, watt eck doa teo ßoän krihgen häbbe, datt hätt moe doach datt Bleot noahn Koppe drihbn.

Joa, dä Loähnsken hätt äok upp joädn Bahnsteig 'n Pott mett Bläom'm stoahn, oabba datt roäket  joawall fo ßoan'n gräodn Ummestuige-Bahnhoaff nich iut! Nai, huia hätt dä „Deutsche Bundesbahn“ oän'n ganzen Bahnsteig oasse Park anlächt! Doa mott ßick Önnhiusen bäole mett ßuin'n Kuapahk watt schäm'm! Van’n Bahnhobe ganich maia teo küan.

Nai, dä ganze Bahnsteig 3 in Loähne eß oän Bläom'mbedde! Dä schönste „Botanische Garten“! Un oalles ßäo richtige „urwüchsige“ Bläom'm. Äok dä ganzen Anlage eß ßäo „urwüchsig“! Gakaine Voännerung ßait äoln Tuin! Woänigstens  nich sait dänn 14. März 1945!

Doa stoaht Duißel un Koök, doa eß Kloaban un Trihms, oach eck kann dä vihln Szochten oalle ganich binoähm’m. Eck gloäbe ßanne Oat „Heilgarten“ eß doa äok mett buigge. Eck moäne Kamelln un Nihdl hädde eck äok ßoähn. Oabba eck nihme an, datt ßick dä Scheolmästas mett üan Kinnan hännig ümme düsen „Botanischen Garten“ buikümmat, dä ligg doach vihl gelegena oasse Builefeld.

Un wäe kümmt dänn näo in iusen Kuapark oadda int „Tropenpflanzenhaus“?

Ganz ümmeßüß kuhmt bleoß dä Lui teon Buikuiken van düssen Urbläom’m-goahn, dä in Loähne ümmestuiget. Dä annan möddn Sülbagroschen buitahln. Dä kruiget dänn ßoanne „Bahnsteigkarte“. Oabba ganz harin kümmt in düssen ßältn Goahn kain Minske! Dänn äok bui bäßta Uppßicht könne doach düsse „Urwüchsigket“ in Gifoah kuhm’m. – Oapp dä Bundesbahn düssen „Urpark“ äok näo mett „Urtieren“ buißedden well, häbbe eck nich hariut fuin’n konnt, eß oabba anteonihm’m. Möglicherwuise kümmt dat oabba oall van ßümß! – Un wäa buißöcht dänn näo iuse „Wildgehege“?

„Poppenßuiks Busk“ es oall ßäo teon „Löhner Stadtpark“ woan, dä Königstroade in Loähne eß oall niu mett dä in Önnhiusen ganich maia teo vogluiken! Un niu dütt näo!

Nai, wänn doa nicks unnanoahm’m waiat, dänn stuiget dä Lui nich maia in Loähne ümme, dänn stuiget ßä in Loähne iut! Un dänn höält giwisse äok moall wia Schnellzug in Löähne! – Un woa blifft dänn Bad Oeynhausen?! –

                                                                                      Jiu Otto van’n Stickdoäan

 
 

pdf-datei