Muine loäbn Noahbas un Frünne!

Wo man oasse Kuind buigge anfängt, doa hoöat man oasse äole Minske äok wia medde upp! – Muine oäasten Wäake woöan datt Koeggehoen un datt Kinnavowahn. Mett dänn Koeggehoen hätt datt joa düht noaloadn. Doa bringet man vandahge kaine Bracken maia teo un äole Lui äok nich. Datt mahket niu oalle dä  « elektrische Weidezaun » !Oabba mett dänn Kinnavowahn eß datt doach just ßäo blihbn oasse in dä äoln Tuit. Oadda eß datt doach annas woan ?

Doa hebbe eck moe doach vogoahn Szunndach äok moall datt Kinnaradio andraigget. Doa hadde ßick soan Junge oasse   « Bäbißitta »  vomaiht. Watt datt es, ßoann „Bäbißitta“, datt hebbe eck nich ganz buigrihbn. Oabba datt was joa äok nich noädich, dänn datt was joa bleos fo iuse Kinna !

Kocht un geot : Düsse Dolf van’n Jungen mosse buin’n Kuine bluibn un schloäp niu hänniga in oasse datt vowuhnte Kuind ßümß. – Oabba « Bäbißitta » ?! – Datt es mui bui muin’n oägen Studentn früha doach äok passiat, wänn eck doa  ’s Oahms oallhand ’n bihdn buibucken mosse, bett datt ßä inschloäbn. Oabba mein Muinken passe oall upp, datt eck wia teogange kamm, wänn eck äok mett induhmelt was. Doach oänmoall was moe datt Lütke doach oall wia düan Däo goahn ! – Oabba « Bäbißitta » ?

Szäowatt hadde eck doach muin Lihbe näo nich hoäat ! Datt ßall wall wia watt iudn Iutlanne ßuin, watt ßä doa gaian läossuin möchen wie « Teenager », « Peddiko » un « Jazz ». Vonünftige Kinnamehkens un Kinnaluidns ßö wui wall wegen «Arbeitkräftemangel » un  « Arbeitzeitverkürzung »  nich maia kruigen kühn’n. Un dänn kruige wui ßoanne „Bäbißittas“ iut Ängeland oadda ßüß woa dänne, dä iuse Kinna nich vostoahn könnt un nicks medde anfangen könnt. Kann doa van iuse Kinna watt waian ? – Muinlihbe nich !

Eck ßin niu upp muine äoln Dahge wia Kinnamehken woan ! Eck häbbe moe ümme düssen Posten just nich rihdn, oabba ett eß Windadach, un wän’n sdänn näo Hoppa woan eß, dänn kann man äok schlächt affßeggen!

Wisse früha ledde datt näo annas oasse vondahge. Man konn mett dä lüttken Dudden näo ganz annas harümmeralken un harümmewibbn. – Oabba datt ßoan’n Pruk unna nich doanne teobacken eß, datt hätt oän’n doach fahken anfoäat. Joa, ßäolange oassen ßä näo in Ähsdoekan, Wickelfoa un Wickelbänna ßoädn, woöan ßä oallhand kliudndichte. Man, wänn dä Foöde ßick dä Fruihoät voschafft hedden, dänn wast oall laiga! Joa, wänn man oak ’n Weäwecke oadda datt Weaanßeggen düat Radio hat hedde! Doa konn dä Szun’n näo ßäo wacka schuin’n, wänn man ßoan’n Spoaß ubbn Schäode hadde, - mett oänmoall gafft ’n wahm Schua Regen! Eck ßegge, wänn näo vohea anßächt woan woöa! Man vonamm datt jümma oäast, wännt teolade was, wännt inna oägn Bücksen was! Un datt was lästig! Un joädesmoall ümmetoän konn man ßick doach äok nich! Un dänn kihken oän’n dä Lui äok mett Gnickan un Gnaigeln an!

Nai, doa häole eck datt doach in düssen Dailen mett dä nuiggen Meode! Eck was niu bui muin’n Gräotkuine, datt eß niu äok oall ’n streffen Jungen van’n Joah. Watt häbbe eck in muin’n nuiggen Tuige’n Frochtn hatt vo dat Häochwahda! Un oasse dä Bengel noa oalle dä Wipparuigge stille woch un’n ganz stua Gißichte mahke, doa mosse eck doach moall dä Szahke unnßoöken. Oabba watt was datt? Dä Junge hadde’n Unnabücksen van Gummi anne! Doa was kain „Abzug“ inne! Niu häbbe eck kaine Bange maia! Niu ßinn eck gaian un fahken Kinnamehken!