Muine loäbn Noahbas un Frünne!

Oänlick woll eck Ji datt ganich votelln! Ji lachet moe doach bleos iut! Oabba eck hoöat joa nich! – Eck häbbe niu äok ßoan Moped! – Niu hoöa eck dat Lachen un Spitzen doach oall! „Ach, diu loäbe Tuit, watt hä wui us oall oabba düsse Stroahdnflöägge äagat! – Dä jungen Schloöße künnt van dä Huilaruigge un Knaddaruigge joa nich gineog kruigen! – Man eß ßick joa ßuines Lihbns nich maia ßicha ubba Stroade! – Un niu häß diu äok näo ßoann Gidoäat?“ – Joa, joa, eck häbbe moe oabbe dä Öästa just ßäo äagat oasse Ji! Un eck äaga moe vondahge äok näo!

Eck was joa mett muin’n Flitzepeh jümma näo geot teofruidn, wänn eck äok von’n Brinke düht int Schwaidn kamm. Fahken ßehn dä Lui äok, eck mösse medda Tuit mettgoahn, dänn „Zeit ist Geld“! Oabba’n bihdn Buiwegung buikaime moe ganz geot. Datt was ebn muin Sport! – Oabba wi datt ßäo eß. Dä Kuiken ßind joa oallhand kloöka oasse dä Hin’n! – Eck häbbe hoöat, datt ett in Amerika joa näo behda ßuin ßoll oasse bui uß. Doa droäp eck doach lessens ßoan’n Mannsminsken, dä oall oabba datt gräode Wahda wesen was. Niu ßin eck dä Szake ubbn Grund goahn un häbbe ühn froaget, oapp datt woah woöa, datt ett in Amerika behda woöa oass bui uß. – „Joa,“ männe hoä, „datt stimme“,  - Un woa datt dänn anne loäge. – In Amerika löäffen dä Äoln üan Kinnan behda oasse bui uß! – Noa, niu wusse eck Buischoäd! Eck loäbe, dänn ßinn wui oabba äok oall geot ubbn Gange!

Muin ölste Junge hätt geot laiat un eß äok wuidakuhm’m. Däo duat dänn nich lange, doa mosse hoä äok’n Moped häbbn. Szüß könne hoä mett dä Tuit nich maia mettkuhm’m. Un dänn koäme hoä joa oba Szunnoahmt un Szunndach noah Hius, Dänn könne eck joa äok doamedde foöan un muine Buißoagungen maken. – Noa, eck häbbe dänn Jungen dänn äok’n gräodn Schuin gihbn fo dänn geon Willn! –

Mett dänn Inkuhm’m namm datt medda Tuit äok düht aff. Oapp doa wall langet Hoa tüsken ßatt? – Datt Gischäft mosse ßick wall geot mahket häbbn, dänn datt Moped roäke medda Tuit nich maia iut. Ett mosse’n Auto ßuin! (Joa, upp dänn Moped was man bläoß oän Sitz un kain Dack ubbe!) Datt Moped sall eck niu teo Gihbe häbbn. Eck hädde doach ßäovihl Läoparuigge, un ölla wöache eck doach äok! – Eck loäbe dä Junge wusse ganz geot, datt buin Gihbn an dä Oöllan doach jümma’n bihdn buigge hariutkümmt! Datt was teo muina Tuit äok oall ßäo. – Dä Junge hätt nich maia vihl buin Finazamte affschruibn briukt!

Mett dänn Foöan kraig eck datt hännig hariut, wänn moe äok düsse Droahtisel oallhand midden ubbn Kruizwege stoahn loät un wianöstach woch! Dä Lui lachen dänn äok fahken, wänn eck muin Pead maia drehgen mosse, oasse ett moe. Oabba ubbn Luiken hä wui us dänn wuia vodrehgen. Äok datt häbbe eck ühn wia vogihbn, datt hoä moe oän’n Oahmt, oasse eck lahde vanna Voßammlung kamm, oänfach stoahn loät. Hoä loät ßick nicks inßeggen, un eck mosse muin Rad noa Hius schiubn. Eck dompe, oasse eck muin’n „Hälpmett“ in’n Stall kraig. un watt kraig eck teo ßoähn, oasse eck dä Lucht andraigge? Dä Benzinkran was teogge! – Jäa, ohne Foa witt düsse Pea äok nich toän!

Oabba äok krank könn düsse Benzinpea waian! Doa was eck doach in’n vogohn Szomma bui dä gräodn Hidde ubba Widdelsken Buskbühn’n. Dänn Jungen hadde eck äok mett achta uppnoahm’m. Oasse dä Spihlaruigge dänn vobui was ßedde eck dänn Lüttken wia achta upp un ßiuse aff! – Joa, datt hadde eck moe dacht! – Wänn eck dänn Pea äok dä Spoan gaff, mahke hoä bläoß’n pamoall „Bluff, bluff“ un täoch nich an. Eck häbbe troampelt, dä Junge mosse schiubn! – Wui woäan boäde mässnatt! – Nai Foa hadde äok näo in’n Balge! – Niu loät eck muin Pead meddn lihgen Schwängel dänn ganzen Bäag harunnaläobn, un voßoche moall ßäo mett Szucka! – Oabba hoä flöttke moe watt! – Niu mosse eck ühn ßümß wia haruppkweln! Eck schwaide in muin’n vulln Tuige äaga oassen Pead! Eck schmaid lesten Ännes muin’n Mandel iut, dänn eck jümma ubbn Rah anne häbbe un mahke ühn un muin’n Jobbn achta upp dänn Truiggesitz.

Un watt kruige eck niu teo ßoähn? – Muin Pead hätt Vostoppung! Achta datt Puttloack ßatt ganz vull Aian! – Joa, dänn kanne wall Koluik häbbn! – Oabba wi kamme doa an? – Hadde moe doa oänna’n Straich spihlt? Oadda hadde eck datt wall ßümß mahket? – Ett was ühn bui dänn Spihln doa teo lang woan, un hoä was liggen goahn. – Un wail Pea ßick füa tooäast  upprichtet, hadde eck muin’n Benzinhecktor äok ßäo upprichtet. Villichte wasse doabuigge achtateo faste ubbe Aian kuhm’m!

Kocht un geot, neon Voädokta briuke eck niu nich maia hänn. Dä Klistia häbbe eck meddn Stocke ßümß mahket. Un dä hätt äok ßäo butz hulbn! Hoä schmait ßick niu int Geschia wi ßoan Hingstfölln! Ji heddn moall hoöan ßollt, wi hoä niu affproatze! Wi ßoan Pead, datt van’n Stalle kümmt un ßäo richtig wallmoädig eß!

Eck ßegge joa, bui düsse Benzinpea hoäat äok’n dühdn Knächt un kain Laiajunge! – Un wäa medda Tuit goahn wäll, dä mott oabba doach äok inne richtigen Laia!