Muine loäbn Noahbas un Frünne!

Wänn dä Moätuit mett Szunnenschuin un wahm'm Regen, mett Vugelßingen un Bläom'mbloöggen wia doa eß, dann kuhmt dä Lui oalle iut Rand un Band. Joa, äok dä Äoln! - Nai, nich maia in Büsken un Brahken, nich maia ßäo mett „Küssen un Kosen“! - Nai, dä Äoln kruiget dat mett dä „Brunnaruigge“ .-Wänn man oäast oänmoal in'n Bade wesen eß, dänn obakümmt oän'n joädet Joa ümme düsse Tuit ßoan Hoämewoäh. Und muin Ischias, dänn eck moe 1942 iut Rußland mettbroacht häbbe, fängt äok just inna Broaketuit an teo ruidn un teo ram'm. Eck gloäbe, eck mösse doa näomoal ubbn Szoaltwäake noaßeddn, dänn dä Foöakua fogen Häafst hätt nich rächt hulbn. Oadda oapp eckt düttmoal nich moal medn Szaibreoke oadda Szändelduike voßeoke? - Düsse Schlamm- un Moabäda ßött doa äok geot fott Ruidn ßuin. Kümmt moe doa 'n Szunnoamt Jüan Bässenbuina inne Moede. Ji kinnt ühn do oalle vanna Widdelsken Buskbühn'n! -Hoä was an'n Prussen un Schniubn, dat hoä moe kium Dagestuit ßeggen konn! –„Jöan“, ßeä eck, „eck gloäbe, wui böadn mössen moaII tedhäope noan Szoaltwäake un us frisk uppmüssen loahdn“. Jüan wiske, prusse un schüddekoppe in oäna Tua. –„Jäa, Jüan, eck mott noädig wat gigen muin'n Ischias unnanihm'm. Un wui hätt dän Joadanspriudel ßäo doanne fodda Düa“. -Kium hadde eck dat Woat „Jordansprudel!“ hariutbroacht, däo kamm Jüan upp moe teo, mahken Gißichte, dat eck doach 'n Trätt truigge doä.

Oasse Jüan 'n bihdn Unnaludtt kraich, fuchel hoä mett dä Kniufuiste inna Luft harümma, un dänn junket läoß, oasse wän'n meddn Stocke ubba Leddan dahlritt: „Hinnack, schwuich moe bleoß stille van'n Jordanspriudel! Vann dänn äoln Wahda häbbe eck dä Nehsen full!“ - Jüan mosse öast ßuin gräode roa Taskendeok wia briuken. Niu jünkt wuida: „Doa was eck doa 'n Fredage fo acht Dahgen noa Önhiusen un buißoche muine Szüsta in'n Krankenhiuse. Noa, diu woäs joa, wänn man oäast int Küan kümmt, dän löäpt oän'n dä Tuit wäch. Un leßten Ännes brännet moe ubbn Nagel. In'n hännigen Galopp siuse eck dänn aff. Dä noägeste Wäch noa muin'n Omnibus eß dä oba dä lüttken Bruiggen bui dänn Jordansprudel. - Nui äok dat Maläa näo Dä ganßen Bruigen stoand full van Kurgästen, dä sick dat Blickspell van düssa Spruingwelln nich entgoahn loadn wolln. „Oabba, Jüan, hindurch“ ße eck moe. - Just ßäo hadde fruindlich sind düsse Kuagäste äok nich. Wänn eck niu hän un wia äok moall ßoanne Dahme ubbn Feod trähn häbbe, dän briukt man doach nich gluiks ßäo schelln un ratzen! -Eck moäne, wänn moe moal 'n Keoh ubbn Feod trätt, dänn eß datt doach 'n bihdn wat annas.

Oasse eck niu glücklidt in in  „vorderster Linie“ stoand, ßäoch eck, dat dat Änne van dä Bruiggen unna „feindlichen Beschuß“ lach. Dat Wahda fan dänn „Jordanspriudel“ knalle man jümma ßäo upp dä  Bruiggen.

Eck kaik moe ümme, oabba oasse eck dä Gißichta ßäoch, ßäoch eck äok, dat et huia äok kain'n „bewaffneten Rückzug“ gaff. - Oabba dä Omnibus luat nich! – Doa, mett oänmoale kamm moe dä Wuind teo Hülpe! Hoä dräigge dän gräodn Stroahl ßoan bihdn ubbe Szuit un eck siuse aff. -Jäo, dänkse! -Just hadde eck geot anspoat, däo kamm dä ganße Wahdagischichte wia truigge un moe ubbn Baß! Eck woöa bäole hänschlagen un konn moe just näo efken oba Änne häolen! Eck kamm äok düa! Oabba wick? Kain'n druigen Fahmt hadde eck maia an Luibe! Buifall kraich eck ubba ganßen Luingen! Buißoannas vanna Bruiggen hea! Eck in'n Galopp aff! - Un dä Bus was näo wege! Eck mosse dän ganßen Wäch toe feode läobn! Unnawegens woch eck joa 'n bihdn käolt, obe dat was joa Hailwahda iudn „Jordansprudel“. Dat kann doach bleoß geot  ßuin!

Doa ßinn eck nich dümma noa woan! Acht Dahge häbbe eck mett „Grippe“ unnan Bedde ßedn! Un nui jümma näo dänn Schniubn! - Hinnack, Hinnack, nimm di fon Szoaltwäake un fo düssen „Jordansprudel“ in achte! Junge, Junge loatt di nicks foküan! -Wuida kamm Jüan nich. Unna Prussen un Heoßen gaff hoä moe just näo dä Hand, un weg wasse.

Dänn ßalt doach wall behda ßuin, wänn eck noan Szänkelduike oadda noan Szaibreoke goah.Wat moäne Ji doateo?